త్వరలోనే సెట్స్పైకి వెల్కమ్ 3, వెల్కమ్ 4
బాలీవుడ్ లో విజయవంతమైన వెల్కమ్ చిత్రానికి రెండు సీక్వెల్స్ రూపొందేంచుకు చిత్రబృందం సిద్ధమైంది. త్వరలోనే షూటింగ్ ప్రారంభించి నాలుగు నెలల వ్యవధిలో రెండు చిత్రాలను విడుదల చేయనున్నారు.
బాలీవుడ్లో సీక్వెల్స్ షరా మామూలే. విజయవంతమైన చిత్రాలకు కొనసాగింపులు రూపొందిచడం పరిపాటిగా మారింది. వెల్కమ్ సిరీస్లో ఇప్పటికే రెండు సినిమాలొచ్చాయి. ఇప్పడు మరో రెండు సీక్వెల్స్ తీయాలని చిత్రబృందం నిర్ణయించుకుంది.
జాన్ అబ్రహం, అనిల్ కపూర్, పరేష్ రావల్, నానా పటేకర్ ఈ చిత్రాల్లో ప్రధాన పాత్రధారులుగా నటించనున్నారు. 2007లో వచ్చిన మొదటి వెల్కమ్ చిత్రానికి అనీష్ బజ్మీ దర్శకత్వం వహించగా ఫిరోజ్ నడియాడ్వాలా నిర్మించారు. అక్షయ్ కుమార్, కత్రినా కైఫ్, ఫిరోజ్ ఖాన్, నానా పటేకర్, పరేష్ రావల్ నటించిన ఈ చిత్రం ఘనవిజయం సాధించింది. ఆ చిత్ర కొనసాగింపుగా 2015లో వచ్చిన 'వెల్కమ్ బ్యాక్' కూడా విజయవంతమైంది.
ప్రస్తుతం ఒకేసారి వెల్కమ్ 3, వెల్ కమ్ 4 చిత్రాలను తెరకెక్కిస్తామని చిత్రబృందం ప్రకటించింది. రెండు చిత్రాలకు అహ్మద్ ఖాన్ దర్శకత్వం వహిస్తారని.. మూడో చిత్రాన్ని 2020లో, నాలుగో సినిమాను 2021లో విడుదల చేస్తామని ప్రకటించింది. త్వరలోనే ఈ సీక్వెల్ సినిమాల చిత్రీకరణ ప్రారంభం కానుంది.