Robotic Sai Baba idol in Vizag : సాయిబాబా.. ఈ పేరు వినగానే ఆంధ్రప్రదేశ్లోని విశాఖ పరిసర వాసులకు చినగదిలిలోని నార్త్ షిర్డీ సాయి దేవాలయమే గుర్తుకువస్తుంది. ఈ ఆలయంలోకి అడుగుపెట్టగానే స్వయంగా సాయిబాబానే భక్తులకు సూక్తులు బోధిస్తూ దర్శనమిస్తారు. సాయిబాబా ఏంటి బోధనలు చేయడం ఏంటీ అనుకుంటున్నారా..? ఇదంతా రోబోటిక్ సాయిబాబా మహిమ. అచ్చం మానవ రూపంతో, మాటలకు నోరు కదుపుతూ, తల ఆడిస్తూ, సహజమైన ముఖ కవళికలతో.. ఆ సాయి నాథుడే దిగివచ్చారా అనే రీతిలో మైమరిపిస్తోంది.. రోబో గాడ్.
ఈ రోబోటిక్ బాబాను ఏయూ ఫైన్ ఆర్ట్స్ విద్యార్థి అయిన రవిచంద్ మూడేళ్లు శ్రమించి రూపొందించారు.. సిలికాన్ పదార్థంతో ముఖాన్ని, కెనడా నుంచి తెప్పించిన ప్రత్యేక ఫైబర్ గ్లాస్‌తో మిగిలిన భాగాలను తయారు చేశారు. అధునిక సాంకేతికతకు , వాయిస్ సింకరనైజేషన్ జోడించడంతో .. ఆ సాయిబాబానే చూసిన అనుభూతిని భక్తులు సొంతం చేసుకుంటున్నారు. ఈ దైవ రోబోను దర్శించుకున్న భక్తుల ప్రచారంతో.. విశాఖ నుంచే కాక చుట్టుపక్కల ప్రాంతాల నుంచి ఆలయానికి భక్తుల తాకిడి బాగా పెరిగింది.
"నిజంగా ఈ రోబో సాయిబాబాను చూసి ఆశ్చర్యపోయాను. వైజాగ్‌లో ఇలాంటి రోబో సాయి ఉండటం ఆనందంగా ఉంది. అందరూ వచ్చి ఈ రోబోసాయిని చూడాలి. నిజంగా షిర్డీలోని సాయిబాబాను చూసినట్లే ఉంది." - లక్ష్మి, భక్తురాలు