గాంధీ స్ఫూర్తితో మోదీ ప్రభుత్వం ముందుకెళ్తోంది: కిషన్​రెడ్డి

మహాత్మాగాంధీ చేపట్టిన స్వదేశీ ఉద్యమాన్ని ఆదర్శంగా తీసుకుని కేంద్ర ప్రభుత్వం అన్ని రంగాలను అభివృద్ధి చేస్తోందని కేంద్ర మంత్రి జి.కిషన్​రెడ్డి పేర్కొన్నారు. లంగర్​హౌస్​లోని బాపూ ఘాట్​లో నిర్వహించిన గాంధీ జయంతి వేడుకల్లో పాల్గొని.. నివాళులు అర్పించారు.

మహాత్మా గాంధీ స్ఫూర్తి, ఆలోచనా విధానాలతో మోదీ ప్రభుత్వం ముందుకు వెళ్తోందని కేంద్ర హోంశాఖ సహాయ మంత్రి జి.కిషన్​రెడ్డి పేర్కొన్నారు. ఉప్పు సత్యాగ్రహం, ఖాదీ దుస్తుల తయారీ కోసం గాంధీజీ చేపట్టిన స్వదేశీ ఉద్యమాన్ని ఆదర్శంగా తీసుకొని కేంద్ర ప్రభుత్వం అన్ని రంగాలను అభివృద్ధి చేస్తోందని తెలిపారు. గాంధీ జయంతిని పురస్కరించుకుని లంగర్​హౌస్​లోని బాపూ ఘాట్​లో నిర్వహించిన వేడుకల్లో ఆయన పాల్గొన్నారు. ఈ సందర్భంగా మహాత్ముడి విగ్రహానికి పూలమాల వేసి నివాళులర్పించారు.​

ఆత్మ నిర్భర్ భారత్ కోసం ప్రధాని మోదీ ఎన్నో పథకాలు చేపడుతున్నాడని కిషన్​రెడ్డి స్పష్టం చేశారు. కరోనా వంటి క్లిష్ట సమయంలో దేశం అన్ని రంగాల్లో అభివృద్ధి చెందాలంటే ఆత్మనిర్భర్ భారత్‌ను నిర్మాణం చేసుకోవాలని సూచించారు.