తెలంగాణకు సముచిత న్యాయం: కేంద్రమంత్రి అనురాగ్​ ఠాకూర్​

కరోనా సమయం నుంచి తెలంగాణకు కేంద్రం సముచిత న్యాయం చేసిందని హైదరబాద్‌లోని భాజపా కార్యాలయంలో కేంద్ర ఆర్థిక శాఖ సహాయ మంత్రి అనురాగ్ ఠాకూర్ వెల్లడించారు. మోదీ ప్రభుత్వం అత్యంత పారదర్శకంగా బడ్జెట్‌ను రూపొందించిందని పేర్కొన్నారు.

తెలంగాణను ఎవరూ విస్మరించలేదని కేంద్ర ఆర్థిక శాఖ సహాయ మంత్రి అనురాగ్ ఠాకూర్ స్పష్టంచేశారు. కరోనా సమయం నుంచి తెలంగాణకు కేంద్రం సముచిత న్యాయం చేసిందని ఆయన వివరించారు.

హైదరాబాద్‌లోని భాజపా కార్యాలయంలో మీడియాతో మాట్లాడిన అనురాగ్‌ ఠాకూర్‌... కొవిడ్‌ సమయంలో ఏ ఒక్కరూ ఇబ్బంది పడకూడదనే నిత్యావసర సరకులు అందించామని అన్నారు. మోదీ ప్రభుత్వం అత్యంత పారదర్శకంగా బడ్జెట్‌ను రూపొందించిందన్న అనురాగ్‌... ఇది అన్ని వర్గాలకు మేలు చేకూరుస్తుందని పేర్కొన్నారు.

విశాఖ ఉక్కు పరిశ్రమలో పెట్టుబడుల ఉపసంహరణ ద్వారా ఎవరికీ నష్టం లేదని స్పష్టం చేశారు. అవసరమైతే కంపెనీ ఉద్యోగులతో కలిసి మాట్లాడుతామని తెలిపారు. నీతీ ఆయోగ్‌ సూచన మేరకే దేశవ్యాప్తంగా కంపెనీల నుంచి పెట్టుబడులు ఉపసంహరణ చేస్తున్నామని అనురాగ్ పేర్కొన్నారు. ఏ కంపెనీ ప్రజలకు ఉపయోగపడుతుందో పరిశీలిస్తున్నామని... అన్ని కంపెనీలను ప్రైవేటుపరం చేస్తామన్నది సరైందికాదని చెప్పారు.

విశాఖ ఉక్కు ఫ్యాక్టరీ ప్రైవేటైజేషన్ ద్వారా దేశానికి, ఉద్యోగులకు, కంపెనీ అభివృద్దికి ఎంతగానో ఉపయోగపడుతుందని చెప్పారు. తామీచ్చిన హామీ మేరకు పోలవరానికి నిధులు ఇచ్చామని వెల్లడించారు. ఆంధ్రప్రదేశ్‌ ఆర్థిక మంత్రితో మాట్లాడి అగ్రిమెంట్‌ మేరకు నిధులు కేటాయించినట్లు తెలిపారు.

కేంద్ర నిర్ణయంతో ఏపీ, తెలంగాణకు అనేక ప్రాజెక్టులు అలకేట్ చేశామని అన్నారు. తెలంగాణలో రైల్వే లైన్లు ఎలక్ట్రిఫికేషన్ కోసం నిధులు కేటాయించినట్లు స్పష్టం చేశారు. కొత్తగా ఎవరిపైనా పన్నుభారం వేయలేదన్నారు. ఆర్థిక వ్యవస్థను ముందుకు తీసుకెళ్లేందుకు ఈ బడ్జెట్ ఉపయోగపడుతుందని అనురాగ్ సింగ్ ఠాకూర్ వివరించారు.

ఇదీ చదవండి :దిల్లీ​ సరిహద్దుల్లో 50 వేల మంది బలగాల మోహరింపు