'రాష్ట్రంలో కూడా కేంద్ర మార్గదర్శకాలు పాటించాలి'

కేంద్రం మార్గదర్శకాలకు అనుగుణంగా రాష్ట్ర ప్రభుత్వం 50% ఉపాధ్యాయులు మాత్రమే పాఠశాలలకు హాజరయ్యే విధంగా ఆదేశాలు ఇవ్వాలని టీఎస్​యూటీఎఫ్ రాష్ట్ర కార్యదర్శి రవి కోరారు. రాష్ట్రంలో కేంద్ర నిబంధనలకు విరుద్ధంగా ఆగస్టు 27 నుంచి ఉపాధ్యాయులందరూ పాఠశాలలకు రావాలనడం సరికాదని ఆయన తెలిపారు.

రాష్ట్రంలో సెప్టెంబర్ 1 నుంచి ఆన్​లైన్ తరగతులు ప్రారంభిస్తున్న తరుణంలో... ఆగస్టు 27 నుంచి ఉపాధ్యాయులందరినీ పాఠశాలలకు హాజరు కావాలని ప్రభుత్వం ఆదేశించింది. ఈ నిర్ణయం కేంద్ర ప్రభుత్వ మార్గదర్శకాలకు విరుద్ధంగా ఉందని టీఎస్​యూటీఎఫ్ రాష్ట్ర కార్యదర్శి రవి అన్నారు.

కేవలం 50 శాతం ఉపాధ్యాయులు మాత్రమే పాఠశాలలకు హాజరు అయ్యే విధంగా చూడాలని రాష్ట్ర ప్రభుత్వాన్ని కోరారు. మిగిలిన 50% ఉపాధ్యాయులు ఇంటి నుంచే తరగతులను పర్యవేక్షించే అవకాశం కల్పించాలని రాష్ట్ర ఐక్య ఉపాధ్యాయ ఫెడరేషన్(టీఎస్​యూటీఎఫ్) ప్రభుత్వానికి విజ్ఞప్తి చేసింది. ఉపాధ్యాయులు అందరూ ఒకేసారి పాఠశాలలకు వెళ్తున్న సందర్భంలో కొవిడ్ వ్యాప్తి ఎక్కువగా జరిగే అవకాశం ఉందన్నారు.

కేంద్ర ప్రభుత్వం విడుదల చేసిన అన్​లాక్ 4 నిబంధనల ప్రకారం సెప్టెంబర్ 30 వరకు విద్యాసంస్థలు తెరవకూడదు. సెప్టెంబర్ 21 నుంచి ఆన్​లైన్ తరగతుల నిర్వహణ కోసం 50% ఉపాధ్యాయులను మాత్రమే... పాఠశాలలకు అనుమతించాలని కేంద్ర ప్రభుత్వం సూచించిందని టీఎస్​యూటీఎఫ్ రాష్ట్ర కార్యదర్శి రవి అన్నారు.

ఇదీ చూడండి :మద్యం మత్తులో భార్యాభర్తలపై దాడి చేసిన అల్లరిమూకలు