TSRTC Independence Day Offer : ప్రయాణికులకు TSRTC గుడ్​న్యూస్​.. పంద్రాగస్టు వేళ బంపర్​ ఆఫర్​.. టికెట్లపై భారీ తగ్గింపు

TSRTC Independence Day Offer : స్వాతంత్య్ర దినోత్సవం సందర్భంగా ప్రయాణికులకు టీఎస్ఆర్టీసీ ప్రత్యేక రాయితీలను ప్రకటించింది. రాష్ట్రంలోని పల్లె వెలుగు బస్సుల్లో ప్రయాణించే సీనియర్ సిటిజన్లతో పాటు.. హైదరాబాద్ సిటీలోని సాధారణ ప్రయాణికులకు టికెట్​లో భారీ రాయితీలను కల్పిస్తూ సంస్థ నిర్ణయం తీసుకుంది.

TSRTC Independence Day Offer : జెండా పండుగ సందర్బంగా టీఎస్ఆర్టీసీప్రయాణికులకు రాయితీని ప్రకటించింది. గ్రామీణ, పట్టణ ప్రాంతాల్లో తిరిగే పల్లె వెలుగు సర్వీసుల్లో వెళ్లే సీనియర్ సిటిజన్లకు టికెట్​లో 50 శాతం రాయితీ ఇస్తున్నట్లు వెల్లడించింది. హైదరాబాద్ నగరంలో 24 గంటల పాటు అపరిమిత ప్రయాణానికి సంబంధించిన టి-24 టికెట్​ను కేవలం రూ.75కే ఇవ్వాలని నిర్ణయించింది. పిల్లలకు టి-24 టికెట్​ను రూ.50కే అందజేయనుంది. ఈ నెల 15న స్వాతంత్య్ర దినోత్సవం సందర్బంగా ఒక్క రోజు మాత్రమే ఈ రాయితీలు ప్రయాణికులకు అందుబాటులో ఉంటాయని టీఎస్ఆర్టీసీ యాజమాన్యం స్పష్టం చేసింది. ప్రస్తుతం సాధారణ ప్రయాణికులకు టి-24 టికెట్ రూ.120 ఉండగా.. మహిళలు, సీనియర్ సిటిజన్లకు రూ.100, 12 ఏళ్లలోపు పిల్లలకు రూ.80గా ఉంది.

ఆగస్టు 15 భారతీయులందరికీ పండుగ రోజు. మన దేశ చరిత్రలో అదొక మైలురాయి. వేల మంది అమరవీరుల త్యాగం ఫలితంగా భారతదేశానికి స్వాతంత్య్రం సిద్దించిన రోజును పురస్కరించుకుని ప్రయాణికుల సౌకర్యార్థం టీఎస్ఆర్టీసీ ప్రత్యేక రాయితీలను ప్రకటించింది. ఈ రాయితీలను ఉపయోగించుకుని స్వాతంత్య్ర దినోత్సవ వేడుకల్లో పాల్గొనాలని టీఎస్ఆర్టీసీ ఛైర్మన్ బాజిరెడ్డి గోవర్దన్, సంస్థ ఎండీ వీసీ సజ్జనార్​లు ప్రజలకు విజ్ఞప్తి చేశారు.

TSRTC Announced Discount on Tickets : స్వాతంత్య్ర దినోత్సవం నేపథ్యంలో టి-24 టికెట్​ను ప్రయాణికులందరికీ రూ.75కే సంస్థ ఇవ్వనుండగా.. పిల్లలకు రూ.50కి అందిస్తోంది. రాష్ట్రంలోని పల్లె వెలుగు బస్సుల్లో 60 ఏళ్లు పైబడిన సీనియర్ సిటిజన్లకు ఒక్క రోజు టికెట్​లో 50 శాతం రాయితీని కల్పించినట్లు యాజమాన్యం పేర్కొంది. 60 ఏళ్లు దాటిన స్త్రీ, పురుష సీనియర్ సిటిజన్లకు ఈ రాయితీ వర్తిస్తుంది. వారు ప్రయాణ సమయంలో వయసు ధ్రువీకరణ కోసం బస్ కండక్టర్​కు తమ ఆధార్ కార్డును చూపించాల్సి ఉంటుంది. స్వాతంత్య్ర దినోత్సవం నాడు హైదరాబాద్ సిటీలోఎక్కువగా ప్రయాణాలు చేస్తుంటారు. పెద్ద ఎత్తున స్వాతంత్య్ర దినోత్సవ వేడుకల్లో పాల్గొంటుంటారు. ఆ రోజున పర్యాటక ప్రాంతాలు, పార్కులకు రద్దీ ఎక్కువగా ఉంటుంది.

ఈ నేపథ్యంలోనే టి-24 టికెట్ పై భారీ రాయితీని సంస్థ ప్రకటించింది. ఈ నెల 15వ తేదీ ఒక్కరోజు మాత్రమే ఈ రాయితీలు అందుబాటులో ఉండనున్నాయి. స్వాతంత్య్ర దినోత్సవ రాయితీలకు సంబంధించిన పూర్తి వివరాలకు టీఎస్‌ఆర్టీసీ కాల్‌ సెంటర్‌ నంబర్లు 040-69440000, 040-23450033లలో సంప్రదించాలని అధికారులు సూచించారు.

TSRTC Gamyam App:ప్రజలకు రవాణా మరింత సౌకర్యంగా, అనుకూలంగా మార్చేందుకు టీఎస్​ఆర్టీసీ ఇటీవలే సరికొత్త బస్ ట్రాకింగ్ యాప్‌తో ముందుకు వచ్చింది. అత్యాధునిక ఫీచర్లతో తీర్చిదిద్దిన బస్ ట్రాకింగ్ 'గమ్యం యాప్‌'ను (TSRTC Gamyam App) ఎంజీబీఎస్​ బస్టాండ్‌లో (MG Bus Stop) టీఎస్​ఆర్టీసీ ఎండీ సజ్జనార్‌ ప్రారంభించారు. ప్రస్తుతం 4170 టీఎస్ఆర్టీసీ బస్సులకు ఈ ట్రాకింగ్ సదుపాయం కల్పించినట్లు స్పష్టం చేశారు. హైదరాబాద్‌లోని పుష్పక్ ఎయిర్‌ పోర్ట్, మెట్రో ఎక్స్‌ప్రెస్ సర్వీసులకు ట్రాకింగ్ సౌకర్యం అందుబాటులో ఉంది.