పురపాలికలను దక్కించుకునేందుకు తెరాస వ్యూహాలు

రెండు మున్సిపాలిటీలు మినహా రాష్ట్రంలోని అన్ని నగర, పుర పీఠాలను కైవసం చేసుకునేందుకు తెరాస వ్యూహాలను సిద్ధం చేసింది. తొమ్మిది కార్పొరేషన్లలో తమ జెండానే ఎగురుతుందని గులాబీ పార్టీ ధీమాతో ఉంది. ఎంఐఎం ఆధిక్యత సాధించిన భైంసా, జల్​పల్లి మినహా మిగతా పురపాలక సంఘాలన్నీ కైవసం చేసుకునేందుకు వ్యూహాలను సిద్ధం చేసుకుంది. మేయర్​, ఛైర్​పర్సన్ల జాబితాకు ముఖ్యమంత్రి ఆమోదముద్ర వేశారు.

పురపోరులో అత్యధిక వార్డులను కైవసం చేసుకున్న తెరాస... తొమ్మిది నగర పాలక సంస్థలు... 118 పురపాలక సంఘాలను దక్కించుకోవాలని ప్రయత్నిస్తోంది. స్వతంత్రుల మద్దతుతో పాటు... ఎక్స్ అఫిషియో సభ్యుల ఓట్లతో కైవసం చేసుకునేలా ప్రణాళికలు రచిస్తోంది. పీర్జాదిగూడ, జవహర్ నగర్, నిజాంపేట, బండ్లగూడ జాగీర్ కార్పొరేషన్లలో తెరాస ఇప్పటికే స్పష్టమైన ఆధిక్యత సాధించింది.

ఆధిక్యం లేనిచోట స్వతంత్రుల మద్దతుతో..

నిజామాబాద్, రామగుండం, మీర్​పేట్, బండ్లగూడ, బోడుప్పల్ మేయర్ స్థానానికి అవసరమైన మెజార్టీ ఏ పార్టీకి లేదు. బోడుప్పల్​లో తెరాస రెబల్స్​గా పోటీ చేసి గెలిచిన ఇద్దరు స్వతంత్ర అభ్యర్థుల మద్దతుతో పాటు... మంత్రి మల్లారెడ్డి, ఒకరిద్దరు ఎమ్మెల్సీలు.. ఎక్స్ అఫిషియో ఓటుతో సునాయసంగా మేయర్, డిప్యూటీ మేయర్ దక్కించుకోనుంది. రామగుండంలో తెరాస 18 స్థానాల్లో విజయం సాధించగా.. ఫార్వర్డ్ బ్లాక్ తరఫున గెలిచిన 16 మంది తెరాస రెబల్స్ మద్దతు తీసుకోవాలని నిర్ణయించినట్లు తెలుస్తోంది. మీర్​పేటలో మొత్తం 46 స్థానాల్లో తెరాస 19... భాజపా 16 స్థానాల్లో గెలిచింది. అక్కడ గెలిచిన 8 మంది స్వతంత్ర అభ్యర్థుల్లో కొందరు తెరాసకే మద్దతిచ్చే అవకాశాలు కనిపిస్తున్నాయి.

ఇందూరును ఇలా పంచుకున్నారు

నిజామాబాద్ కార్పొరేషన్​లో తెరాస... ఎంఐఎం మద్దతు తీసుకోనుంది. గులాబీ పార్టీకి మేయర్, ఎంఐఎంకు డిప్యూటీ మేయర్ పదవులు పంచుకునేలా ఒప్పందం జరిగినట్లు సమాచారం. ఎమ్మెల్యేలు, ఎమ్మెల్సీలు, రాజ్యసభ సభ్యులు అందరూ కలిపి ఐదు ఎక్స్ అఫిషియో ఓట్లు కూడా నమోదు చేసుకున్నట్లు తెలుస్తోంది. బడంగ్​పేట కార్పొరేషన్​పై ఉత్కంఠ నెలకొంది. ఇక్కడ 32 స్థానాల్లో తెరాస 13, భాజపా 10, కాంగ్రెస్ 7, స్వతంత్రులు ఇద్దరు గెలిచారు. స్వతంత్రుల మద్దతును తెరాస కూడగట్టుకుంటోంది. సబిత ఇంద్రారెడ్డి, రాజ్యసభ సభ్యుడు కె.కేశవరావు, ఎమ్మెల్సీలు నాయని నర్సింహారెడ్డి, కాటేపల్లి జనార్దన్ రెడ్డి, ఎగ్గే మల్లేశం ఎక్స్ అఫిషియో సభ్యులుగా నమోదు చేశారు.

113 పురపాలికల్లో విజయం సాధించినట్లే

రాష్ట్రంలోని 118 పురపాలక సంఘాల్లోని సుమారు 113 మున్సిపాలిటీల్లో విజయం ఖాయమైనట్లేనని తెరాస శ్రేణులు చెబుతున్నాయి. 90 శాతం స్వతంత్రులు తమకు మద్దతు ప్రకటించారని తెరాస నేతలు చెబుతున్నారు. వీటితో పాటు ఎక్స్ అఫిషియో ఓట్లను వ్యూహాత్మకంగా వినియోగించుకునేలా ప్రణాళికలు చేశారు. దాదాపు 29 పురపాలికల్లో ఎక్స్అఫిషియో సభ్యుల ఓట్లు కీలకం కానున్నాయి. పెద్ద అంబర్‌పేట, తుర్కయాంజాల్, కోస్గి, ఆదిభట్ల, తుక్కుగూడ, కొల్లాపూర్, వడ్డేపల్లి, అయిజ వంటి మున్సిపాలిటీల్లో నాటకీయ రాజకీయ పరిణామాలు చోటుచేసుకునే పరిస్థితులు కనిపిస్తున్నాయి. కొన్ని చోట్ల అవసరమైతే సభ్యులు గైర్హాజరై... కోరం లేక ఎన్నిక వాయిదా పడేలా చేసే అవకాశం ఉంది. పోటాపోటీ ఉన్న చోట ఎన్నికైన సభ్యులు ఇప్పటికే రహస్య శిబిరాల్లో ఉన్నారు.

అందరికీ సమతూకంగా

రెండు రోజులుగా తెరాస కార్యనిర్వాహక అధ్యక్షుడు కేటీఆర్.. ఎమ్మెల్యేలు, మంత్రులతో చర్చించి వ్యూహాలు ఖరారు చేశారు. ఒక్కో పదవికి కనీసం రెండు పేర్లను సూచించారు. ఉద్యమ కాలం నుంచి ఉన్న నేతలు.. రాష్ట్రావిర్భావం తర్వాత చేరిన నాయకుల మధ్య సమతూకం పాటించారు. మరోవైపు అన్ని సామాజిక వర్గాలకు ప్రాధాన్యం ఇచ్చేలా కూర్పు చేశారు. కొన్ని జనరల్ స్థానాల్లోనూ బీసీలు, మహిళలకు చోటు కల్పించాలని నిర్ణయించినట్లు సమాచారం. నేటి కౌన్సిల్ సమావేశానికి సుమారు గంట ముందుగా అభ్యర్థి పేరును ప్రకటించాలని ఎమ్మెల్యేలకు తెరాస సూచించింది. అవసరమైతే విప్ జారీ చేసే అధికారాలను ఎమ్మెల్యేలకు పార్టీ నాయకత్వం అప్పగించింది.

ఇదీ చూడండి: రాజ్​భవన్​​లో ఎట్​హోం... సీఎం సహా ప్రముఖుల హాజరు