ప్రధాని వ్యాఖ్యలపై తెరాస నిరసనల హోరు.. భగ్గుమన్న గులాబీదళం

TRS Protest against PM Comments :పార్లమెంటులో ప్రధాని మోదీ చేసిన వ్యాఖ్యలను నిరసిస్తూ రాష్ట్రవ్యాప్తంగా తెరాస శ్రేణులు నిరసనలతో హోరెత్తించాయి. మంత్రి కేటీఆర్ పిలుపుతో నియోజకవర్గాల వారీగా రోడ్డెక్కిన గులాబీదళం.... పెద్దఎత్తున ఆందోళనలు చేపట్టారు. రాష్ట్రవ్యాప్తంగా చేపట్టిన నిరసన కార్యక్రమాల్లో మంత్రులు మహమూద్ అలీ, తలసాని శ్రీనివాస్ యాదవ్, గంగుల కమలాకర్, పువ్వాడ అజయ్ కుమార్, ఎర్రబెల్లి దయాకర్​రావుతో పాటు ఎమ్మెల్యేలు పాల్గొని... భాజపా సర్కార్‌ తీరును ఎండగట్టారు.

TRS Protest against PM Comments : తెలంగాణ ఏర్పాటు అంశం మరోసారి రాష్ట్రంలో రాజకీయ పార్టీల మధ్య ప్రకంపనలు రేపింది. బడ్జెట్‌ ప్రసంగంపై రాష్ట్రపతికి ధన్యవాదాలు తెలిపే తీర్మానంపై రాజ్యసభలో ప్రధాని మోదీ చేసిన వ్యాఖ్యలతో నేతల మధ్య మాటల తూటాలు పేలాయి. తెలంగాణపై ప్రధాని అక్కసు వెల్లగక్కారంటూ అధికార తెరాస రాష్ట్రవ్యాప్తంగా రోడ్డెక్కింది. హైదరాబాద్‌ గన్‌పార్క్ వద్ద తెరాస నేతలు, మంత్రులు నల్ల బ్యాడ్జీలు ధరించి నిరసన వ్యక్తం చేశారు. పాతబస్తీ మోతెనగర్‌లో జీహెచ్​ఎంసీ మాజీ డిప్యూటీ మేయర్ బాబా ఫసియుద్దీన్‌ ఆధ్వర్యంలో నిరనస ర్యాలీ నిర్వహించారు. అజంపురా చౌరస్తాలో చేపట్టిన నిరసన కార్యక్రమంలో హోంమంత్రి మహమూద్‌ అలీ పాల్గొన్నారు. కేంద్ర సర్కార్‌ సాయం చేయకపోయినా దేశంలోనే తెలంగాణ నంబర్‌వన్‌ రాష్ట్రంగా ఎదుగుతోందని హోంమంత్రి తెలిపారు.

మంత్రి హరీశ్ ఫైర్

Harish rao fires against PM Comments : ప్రధాని వ్యాఖ్యలపై మంత్రి హరీశ్ రావు భగ్గుమన్నారు. సాగుచట్టాలను రాజ్యసభలో మూజువాణి ఓటుతో ఆమోదించారని అన్నారు. రాజ్యసభలో భాజపాకు మెజార్టీ లేకపోయినా బిల్లు ఆమోదమెలా? అని ప్రశ్నించారు. 33 పార్టీలు సమర్థించిన తెలంగాణ బిల్లు అక్రమమా? ట్విటర్ వేదికగా నిలదీశారు. 4 కోట్ల ప్రజల చిరకాల ఆకాంక్షను మోదీ అపహాస్యం చేశారని మండిపడ్డారు. ఓయూ ఆర్ట్స్ కళాశాల ప్రాంగణంలో నేతలు నిరసన వ్యక్తం చేశారు. ఉప్పల్‌లో ఎమ్మెల్యే బేతి సుభాష్‌ రెడ్డి ఆధ్వర్యంలో ఆందోళన చేపట్టారు. బాలంరాయిలో తెరాస శ్రేణులతో కలిసి కంటోన్మెంట్‌ ఎమ్మెల్యే సాయన్న మోటార్‌ సైకిళ్ల ర్యాలీ నిర్వహించారు.

నినాదాలతో హోరెత్తించిన తెరాస

సికింద్రాబాద్‌లో తెరాస నాయకులు, కార్యకర్తల నల్లబ్యాడ్జీలు, జెండాలతో నిర్వహించిన బైక్‌ర్యాలీలో మంత్రి తలసాని శ్రీనివాస్‌ యాదవ్‌ పాల్గొన్నారు. అభివృద్ధిని చూసి ఓర్వలేకనే తెలంగాణ పట్ల ప్రధాని అక్కసును వెళ్లగక్కారని మంత్రి ఆరోపించారు. పార్లమెంటులో ఇచ్చిన హామీలను భాజపా అమలు చేసిందా? అని తలసాని ప్రశ్నించారు. కశ్మీర్‌ విషయంలో భాజపా ఏ విధంగా చేసిందని అన్నారు. రాజ్యాంగానికి ఇప్పటికే 105 సార్లు సవరణలు చేశారన్న తలసాని... అవసరమైతే రాజ్యాంగాన్ని మార్చుకోవచ్చని అంబేడ్కర్ చెప్పారని గుర్తు చేశారు. ప్రధానిని సీఎం రిసీవ్ చేసుకోవాలని రాజ్యాంగంలో ఉందా? అని ప్రశ్నించారు. సింగరేణిని ప్రైవేటీకరణ చేయాలని మోదీ చూస్తున్నారన్న తలసాని... కేంద్రమంత్రి, భాజపా ఎంపీలు రాష్ట్రానికి ఏం తెచ్చారని నిలదీశారు. కూకట్‌పల్లిలో తెరాస శ్రేణులు నిర్వహించిన బైక్‌ర్యాలీలో ఎమ్మెల్యే కృష్ణారావు పాల్గొన్నారు.

రోడ్డెక్కిన తెరాస నేతలు

ఉమ్మడి వరంగల్‌ జిల్లావ్యాప్తంగా తెరాస శ్రేణులు రోడ్డెక్కాయి. హనుమకొండలో ప్రభుత్వ చీఫ్ విప్ వినయ్‌భాస్కర్ ఆధ్వర్యంలో భారీ ధర్నా చేపట్టారు. రాయపర్తిలో చేపట్టిన ధర్నా కార్యక్రమంలో పాల్గొన్న మంత్రి ఎర్రబెల్లి.... తెలంగాణ ప్రజలకు ప్రధాని వెంటనే క్షమాపణలు చెప్పాలని డిమాండ్ చేశారు. వర్ధన్నపేటలో ర్యాలీ నిర్వహించిన కార్యకర్తలు.... అనంతరం, వరంగల్- ఖమ్మం జాతీయ రహదారిపై ధర్నా నిర్వహించారు. మహబూబాబాద్ తహసీల్దార్ సెంటర్‌లో స్థానిక ఎమ్మెల్యే శంకర్‌నాయక్ ఆధ్వర్యంలో అధికార పార్టీ కార్యకర్తలు నల్లబ్యాడ్జీలు ధరించి.... నిరసన వ్యక్తం చేశారు.

అభివృద్ధి చూసి ఓర్వలేకనే అక్కసు

ఉమ్మడి నిజామాబాద్ జిల్లా వ్యాప్తంగా తెరాస నిరసన చేపట్టింది. జిల్లా కేంద్రంలో కలెక్టరేట్ మైదానం నుంచి ఎన్టీఆర్ చౌరస్తా వరకు పార్టీ శ్రేణులు భారీ నిర్వహించారు. బాల్కొండలో నల్ల బ్యాడ్జీలు ధరించిన తెరాస కార్యకర్తలు భారీ ర్యాలీ నిర్వహించారు. ఖమ్మంలో రవాణాశాఖ మంత్రి పువ్వాడ అజయ్ ఆధ్వర్యంలో భారీ నిరసన ర్యాలీ నిర్వహించారు. అనంతరం జిల్లా పరిషత్‌ కార్యాలయం వద్ద తెరాస శ్రేణులతో కలిసి మానవహారం నిర్వహించారు. రాష్ట్రం ఏర్పడిన ఏడేళ్లలోనే తెలంగాణ సాధించిన అభివృద్ధిని చూసి ఓర్వలేకనే ప్రధాని మోదీ ఇలాంటి వ్యాఖ్యలు చేస్తున్నారని మంత్రి పువ్వాడ ఆరోపించారు.

భగ్గుమన్న గులాబీ దళం

ప్రధాని మోదీ వ్యాఖ్యలను ఖండిస్తూ కరీంనగర్‌లో తెరాస నేతలు, కార్యకర్తలు బైక్‌ ర్యాలీ నిర్వహించారు. మార్క్‌ఫెడ్‌ నుంచి గీతాభవన్ వరకు మంత్రి గంగుల కమలాకర్, మేయర్ సునీల్ రావు ఆధ్వర్యంలో ఈ ప్రదర్శన చేపట్టారు. జగిత్యాల జిల్లా పరిష।త్ కార్యాలయం ముందు స్థానిక ఎమ్మెల్యే ఆధ్వర్యంలో తెరాస కార్యకర్తలు బైఠాయించారు. నిర్మల్‌లో తెరాస నేతలు, కార్యకర్తలు ఆందోళనకు దిగారు. మంత్రి ఇంద్రకరణ్ రెడ్డి ఇంటి నుంచి బైక్ ర్యాలీ నిర్వహించి... నిరసన వ్యక్తం చేశారు. కాగజ్‌నగర్‌లో ఎమ్మెల్యే కోనేరు కోనప్ప ఆధ్వర్యంలో నిరసన వ్యక్తం చేశారు. యాదాద్రి జిల్లా చౌటుప్పల్‌లో నల్ల జెండాలతో తెరాస కార్యకర్తలు నిరసన వ్యక్తం చేస్తూ... ర్యాలీ నిర్వహించారు. నారాయణపేట జిల్లాలో జాతీయ రహదారిపై తెరాస కార్యకర్తలు రాస్తారోకో నిర్వహించారు.

ఇదీ చదవండి:TRS Protest : ఇవాళ నిరసనలు చేపట్టాలని కార్యకర్తలకు కేటీఆర్‌ పిలుపు