తెలంగాణ రైతులపట్ల రాష్ట్ర భాజపా నేతలకు చిత్తశుద్ధి ఉంటే రాష్ట్రంలో కాదు... దిల్లీలో ధర్నాలు చేయాలని తెరాస ఎమ్మెల్సీ పల్లా రాజేశ్వర్రెడ్డి డిమాండ్ చేశారు. రైతుల సంక్షేమం కోసం సీఎం కేసీఆర్ నిరంతరం కృషి చేస్తున్నారని తెలిపారు. భాజపా ఎన్ని అడ్డంగులు సృష్టించినా ధాన్యం కొనుగోలు ఆపలేరని తెలిపారు. రాష్ట్రంలో నిరంతరం ధాన్యం కొనుగోళ్ల ప్రక్రియం కొనసాగుతోందని పేర్కొన్నారు. ఇప్పటికే 3,500 కొనుగోలు కేంద్రాలు ఏర్పాటు చేశామని స్పష్టం చేశారు. ఎప్పటికప్పుడు రైతులకు చెల్లింపులు కూడా చేస్తున్నామని తెలిపారు.
రాష్ట్ర భాజపా నేతలు వరి పండించాలని చెబుతున్నారని.. కానీ ధాన్యం కొనుగోలు చేయబోమని కేంద్రం చెబుతోందని మండిపడ్డారు. యాసంగి ధాన్యం కొనుగోళ్లు.. కేంద్రం చేతుల్లోనే ఉందని తెలిపారు. కనీసం సమాచారం లేని బండి సంజయ్‌ ఒక జాతీయ పార్టీ రాష్ట్ర అధ్యక్షుడిగా ఉన్నారని ఎద్దేవచేశారు. ధాన్యం కొనుగోళ్లపై కేంద్ర వైఖరికి నిరసనగా అన్ని నియోజకవర్గ కేంద్రాల్లో ఈ నెల 12న ధర్నా చేస్తామని తెలిపారు.