ఈ నెల 7న నాగర్‌కర్నూల్ జిల్లాలోని మార్కండేయ ఎత్తిపోతల పథకం పనుల పరిశీలనకు వెళ్లిన కాంగ్రెస్ కార్యకర్తలపై దాడిని నిరసిస్తూ ఆ పార్టీ నేతలు డీజీపీని కలిశారు. దాడికి పాల్పడిన బీఆర్ఎస్ నేతలపై చర్యలు తీసుకోవాలని టీపీసీసీ అధ్యక్షుడు రేవంత్రెడ్డి, సీనియర్ నేత మల్లు రవి, నాగం జనార్దన్రెడ్డి తదితరులు డీజీపీ అంజనీకుమార్కు ఫిర్యాదు చేశారు.
ఈ సందర్భంగా మార్కండేయ ప్రాజెక్టు శిలాఫలకాన్ని సందర్శించేందుకు వెళ్లిన కాంగ్రెస్ నాయకులపై దూషణలు, దాడులకు దిగారని రేవంత్రెడ్డి ఆరోపించారు. గొంతుపై కాలు పెట్టి తొక్కి.. పరుష పదజాలంతో దూషించారని తెలిపారు. దాడికి గురైన బాధితుల్లో ఒకరు గిరిజనుడు, మరొకరు దళితుడు ఉన్నారన్నారు. బాధ్యులపై ఎస్సీ, ఎస్టీ అట్రాసిటీ కేసు పెడతారని అనుకుంటే.. తమ నాయకుడు నాగం జనార్దన్ రెడ్డిపైనే అక్రమ కేసులు పెట్టారని ఆవేదన వ్యక్తం చేశారు. ఇది ప్రభుత్వం, పోలీసుల బరి తెగింపు చర్య అని దుయ్యబట్టారు. ఈ అంశంపై ఆధారాలతో డీజీపీ అంజనీకుమార్కు ఫిర్యాదు చేశామని స్పష్టం చేశారు.
మరోవైపు 12 మంది ఫిరాయింపు ఎమ్మెల్యేలపై సీబీఐ విచారణ చేపట్టేలా చర్యలు తీసుకోవాలని డీజీపీకి మరో ఫిర్యాదు ఇచ్చామని రేవంత్రెడ్డి తెలిపారు. ఎమ్మెల్యేల కొనుగోలు కేసులో హైకోర్టు ఆదేశాల ప్రకారం చర్యలు తీసుకోవాలని ఆయన డిమాండ్ చేశారు. ఆ నలుగురు ఎమ్మెల్యేలతో పాటు మిగతా వారిపైనా సీబీఐ విచారణ చేపట్టాలని కోరామన్నారు.
ఈ అంశంపై చీఫ్ సెక్రటరీని అపాయింట్‌మెంట్‌ కోరితే తప్పించుకు తిరుగుతున్నారని రేవంత్రెడ్డి మండిపడ్డారు. చీఫ్ సెక్రటరీ బాధ్యతారాహిత్యంగా వ్యవహరిస్తున్నారని దుయ్యబట్టారు. సీఎస్ ఉద్దేశపూర్వకంగానే అమ్ముడుపోయిన ఎమ్మెల్యేలకు వత్తాసు పలుకుతున్నట్లు కాంగ్రెస్ భావించాల్సి వస్తుందని రేవంత్ పేర్కొన్నారు. ఫిరాయింపు ఎమ్మెల్యేల 12 నియోజకవర్గాల్లో సంక్రాంతి తర్వాత కాంగ్రెస్ నిరసన కార్యక్రమాలు చేపడుతుందని ఆయన స్పష్టం చేశారు.