ఆర్టీసీ కార్మికుల సమ్మె విచారణ హైకోర్టు నుంచి లేబర్ కమిషనర్ కార్యాలయానికి చేరుకుంది. రెండు వారాల్లో ఆర్టీసీ సమ్మెపై నిర్ణయం తీసుకోవాలని ఆశాఖ కమిషనర్ను హైకోర్టు ఆదేశించింది. ఆర్టీసీ కార్మిక సంఘాల నాయకులతో లేబర్ కమిషనర్ చర్చించి నివేదిక రూపొందించే అవకాశం ఉంది. కార్మికులు విధుల్లో చేరడానికి సిద్ధంగా ఉన్నారని.. డిమాండ్లు నెరవేర్చుకోవడానికే సమ్మె చేస్తున్నారని హైకోర్టుకు ఆర్టీసీ ఐకాస తరఫు న్యాయవాది ప్రకాశ్ రెడ్డి వివరించారు. ఈ తరుణంలో ఆర్టీసీ కార్మికులూ సమ్మెపై ఓ నిర్ణయం తీసుకునే అవకాశం ఉంది. ఇప్పటికే దీక్ష చేస్తున్న ఆర్టీసీ ఐకాస నేతలు అశ్వత్థామరెడ్డి, రాజిరెడ్డి సోమవారం దీక్ష విరమించారు. అఖిలపక్ష నేతల ఒత్తిడి మేరకే దీక్ష విరమించారని... ఆర్టీసీ కార్మికులు తీసుకోబోయే నిర్ణయానికి తమ మద్దతు ఉంటుందని తెజస అధ్యక్షుడు కోదండరాం తెలిపారు.
కీలక నిర్ణయం...
ఈ రోజు జరిగే ఆర్టీసీ ఐకాస సమావేశంలో నేతలు ఓ నిర్ణయం తీసుకునే అవకాశం ఉంది. ఇప్పటికే వీరి తరఫు న్యాయవాది ఆర్టీసీ కార్మికులు సమ్మెను విరమించడానికి సిద్ధంగా ఉన్నారని కోర్టుకు తెలపడాన్ని బట్టి చూస్తే... ఐకాస నేతలు ఆ దిశగా చర్చించే అవకాశం ఉంది. సమ్మెలో భాగంగా ఆర్టీసీ ఐకాస తలపెట్టిన సడక్ బంద్ ను వాయిదా వేసుకున్నారు. ప్రస్తుతం కార్మిక శాఖ కమిషనర్ ఆర్టీసీ కార్మిక సంఘాల నేతలు, కార్మికులతో చర్చించే అవకాశం ఉన్నందున.... కమిషనర్ ముందుంచే అంశాలను కూడా చర్చించే అవకాశం ఉంది. రెండు వారాల్లోపే సమ్మెపై కార్మిక శాఖ కమిషనర్ నివేదిక రూపొందించాల్సి ఉండటంతో... తమ డిమాండ్లు, ఇతర అంశాలు, సమ్మెకు దిగడానికి గల కారణాలను కార్మిక సంఘాలు కమిషనర్ ముందుంచనున్నారు.