Corona Vaccination: టీకాల్లో యువ జోరు.. రెండో డోసు తీసుకోనివారు ఎంతమందంటే..

తెలంగాణలో కరోనా వ్యాక్సిన్ మొదటి డోసు తీసుకుని.. రెండో డోసు స్వీకరించడానికి 35 లక్షల మంది ముందుకు రాలేదని వైద్యారోగ్య శాఖ అంచనా వేసింది. 18-44 ఏళ్ల మధ్య వారికే 55% డోసులు వేసుకున్నారని వెల్లడించింది. దీపావళి నేపథ్యంలో ప్రభుత్వ కేంద్రాల్లో నేడు టీకాలకు సెలవు ప్రకటించింది.

రాష్ట్రంలో పంపిణీ చేసిన కొవిడ్‌ టీకాల్లో సగానికి పైగా డోసులను 18-44 మధ్య వారే పొందారు. రాష్ట్రంలో రెండో డోసు స్వీకరించడానికి ముందుకు రానివారు 35 లక్షల మందికి పైనే ఉంటారని అంచనా. వీరందరికీ యుద్ధప్రాతిపదికన టీకా వేసేందుకు వైద్యశాఖ ఏర్పాట్లు చేసింది. ఈ నెల 4న దీపావళి సందర్భంగా టీకాల పంపిణీకి ప్రభుత్వ కేంద్రాలకు సెలవు ప్రకటించినట్లు వైద్యవర్గాలు తెలిపాయి.

• రాష్ట్రంలో పంపిణీ చేసిన మొత్తం టీకా డోసులు: 3,28,54,475
• ఇందులో మొదటి డోసు: 2.28 కోట్లు (69.43 శాతం)
• రెండు డోసులు స్వీకరించిన వారూ కోటి దాటారు.
• 18-44 ఏళ్ల మధ్య వారికి అందిన టీకాలు: 1,80,32,845 (54.88 శాతం)
• ఇందులో తొలి డోసు: 1,32,80,939
• రెండు డోసులు: 47,51,906
• 45 ఏళ్ల పైబడినవారికి: 1,36,78,216 (41.63 శాతం)
• మిగిలిన టీకాలను వైద్యసిబ్బంది, ఇతర ఫ్రంట్‌ లైన్‌ వారియర్స్‌కు వేశారు.
• సర్కారు వైద్యంలో వేసినవి: 2,89,94,601
• ప్రైవేటులో: 38,59,874

ఇదీ చూడండి:రెండు డోసులు తీసుకున్నారా..? అయితే ఈ 'ఫుడ్'​ ఆఫర్​ మీకే!