నిత్యకల్యాణం పచ్చతోరణంలా కళకళలాడే తిరుగిరులు... కరోనా వైరస్‌ ధాటికి మూగబోయాయి. కొవిడ్‌-19 వేగంగా విస్తరిస్తున్న తరుణంలో... తిరుమల శ్రీవారి దర్శనం కోసం వచ్చే భక్తుల సంఖ్య రోజురోజుకూ గణనీయంగా తగ్గిపోతోంది. అన్ని ఆర్జిత సేవలు, ప్రత్యేక దర్శనాలను రద్దు చేసిన తిరుమల తిరుపతి దేవస్థానం.. కేవలం సర్వదర్శనానికి మాత్రమే అనుమతిస్తుండటంతో... పర్యటకుల సంఖ్య పడిపోయింది. నిత్యం ప్రయాణికులతో రద్దీగా ఉండే తిరుపతి బస్టాండ్, రైల్వేస్టేషన్‌, విమానాశ్రయాలు బోసిపోయాయి. కేంద్ర రాష్ట్ర ప్రభుత్వాల హెచ్చరికలతో అప్రమత్తమైన భక్తులు... దర్శనాన్ని వాయిదా వేసుకోవడం వల్ల... చాలా ఏళ్ల తర్వాత తిరుమల, తిరుపతి సందడి కోల్పోయాయి.
కరోనా ప్రభావంతో ఖాళీ..
రోజూ సుమారు 80 వేల మంది ప్రయాణికులతో అత్యంత రద్దీగా ఉండే తిరుపతి రైల్వేస్టేషన్‌... కరోనా ప్రభావంతో ఖాళీగా మారింది. నిత్యం 60 నుంచి 75 ప్యాసింజర్‌, ఎక్స్‌ప్రెస్‌ రైళ్లు ఈ స్టేషన్‌ మీదుగా రాకపోకలు సాగిస్తాయి. వీటి ద్వారా రోజుకు సుమారు 40 లక్షల రూపాయల ఆదాయం తిరుపతి రైల్వేస్టేషన్‌ ఆర్జిస్తోంది. కరోనా ప్రభావంతో ఇప్పటికే 8 రైళ్లు పూర్తిగా రద్దవగా... మిగిలిన సర్వీసుల్లోనూ ప్రయాణికుల సంఖ్య భారీగా పడిపోయింది. మరోవైపు... దేశం నలుమూలల నుంచి ప్రయాణికులు తిరుపతి రైల్వేస్టేషన్‌కు వచ్చే అవకాశం ఉండటంతో... ఎప్పటికప్పుడు పరిసరాలను సిబ్బంది శుభ్రం చేస్తున్నారు. ప్లాట్‌ఫాంలు, కుర్చీలు, బల్లలు, స్విచ్‌బోర్డులు... ఇలా ఏ మూల వదలకుండా శుభ్రపరుస్తున్నారు. దీని కోసం ప్రత్యేక సిబ్బందిని ఏర్పాటు చేయడంతో పాటు... వారితో ప్రయాణికులకు అవగాహన కల్పిస్తున్నామని రైల్వేస్టేషన్‌ అధికారులు తెలిపారు.