The opposition parties are Protesting: తెలంగాణ పబ్లిక్ సర్వీస్ కమిషన్ ప్రశ్నా పత్రాల లీకేజీ వ్యవహారం.. రాష్ట్ర వ్యాప్తంగా కలకలం సృష్టిస్తూనే ఉంది. సిట్‌ వద్దు.. సిట్టింగ్ జడ్జితో విచారణ చేపట్టాలంటూ విపక్షాల ఆందోళనలు పెద్దఎత్తున సాగుతున్నాయి. టీఎస్పీఎస్సీ పేపర్ల లీకేజీపై.. మల్కాజ్గిరి బీజేపీ నాయకులు ధర్నా చేపట్టారు. నల్లకుంట ఫీవర్ ఆస్పత్రి కూడలిలో.. బీజేపీ సెంట్రల్‌ జిల్లా అధ్యక్షుడు గౌతమ్‌రావు ఆధ్వర్యంలో.. నిరసన దీక్ష చేపట్టింది. మంత్రి కేటీఆర్‌ను కేబినెట్‌ నుంచి బర్తరఫ్‌ చేయాలంటూ.. పరీక్షలు రాసిన నిరుద్యోగులకు లక్ష చొప్పున పరిహారం ప్రకటించాలని.. రంగారెడ్డి అర్బన్‌ జిల్లా అధ్యక్షుడు సామ రంగారెడ్డి ప్రభుత్వాన్ని డిమాండ్ చేశారు.
సిట్టింగ్ జడ్జితో విచారణ జరిపించాలి: చైతన్యపురిలోని శివాజీ చౌక్ వద్ద పార్టీ కార్పొరేటర్లతో కలిసి ఆయన నిరసన దీక్ష చేపట్టారు. టీఎస్పీఎస్సీ అక్రమాలపై సిట్టింగ్ జడ్జితో విచారణ జరిపించాలని బీజేపీ సీనియర్‌ నేత, మాజీ ఎమ్మెల్యే ఎన్వీఎస్ఎస్ ప్రభాకర్‌ డిమాండ్ చేశారు. మల్లాపూర్‌లో నిరసనదీక్షలో ఆయన పాల్గొన్నారు. టీఎస్పీఎస్సీపేపర్‌ లీకేజీలో బాధ్యులపై చర్యలు తీసుకోవాలంటూ.. నిర్మల్‌ కలెక్టర్‌ కార్యాలయం ముందు కుమురం భీం జిల్లా కాగజ్‌నగర్‌లోనూ బీజేపీ నిరసన దీక్ష చేపట్టింది.
రాష్ట్రంలో పలుచోట్ల నిరసన దీక్షలు: హుస్నాబాద్ అంబేడ్కర్ చౌరస్తా, నిజామాబాద్ జిల్లా డిచ్‌పల్లిలోనూ దీక్షలు కొనసాగాయి. ఖమ్మం ధర్నా చౌక్లో బీజేపీ జిల్లా అధ్యక్షుడు గల్లా సత్యనారాయణ దీక్షలో పాల్గొన్నారు. మహబూబ్ నగర్‌లోని తెలంగాణ కూడలిలో నిరసన దీక్ష చేపట్టారు. మరోవైపు ప్రశ్నాపత్రాల లీకేజీపై భేటీ అయిన బీజేపీ టాస్క్ఫోర్స్ కమిటీ యువతకు అండగా ఉండాలని నిర్ణయించారు. హైదరాబాద్ హైదర్‌గూడ లేదా అశోక్ నగర్‌లో టాస్క్ఫోర్స్ కార్యాలయాన్ని ఏర్పాటు చేసి యువత సమస్యలకు అనుగుణంగా పోరాటాలు చేయాలని నిర్ణయించారు. టాస్క్ఫోర్స్ కార్యాలయానికి నేరుగా రాలేని వారి కోసం హెల్ప్‌లైన్ నెంబర్ ఏర్పాటు చేయనున్నారు.