సూర్యాపేట, గద్వాల, వికారాబాద్ జిల్లాలలో శాఖల మధ్య సమన్వయ లోపం వల్లనే కరోనా వైరస్‌ విస్తరిస్తోందని ఉన్నతాధికారులు సీఎం కేసీఆర్కు నివేదించినట్లు తెలిసింది. అధికార యంత్రాంగంపై సరైన పర్యవేక్షణ లేదని, సరిహద్దుల్లో ఉండడం వల్ల సమస్యలు ఉత్పన్నమవుతున్నాయని వారు వివరించినట్లు సమాచారం. అంతేకాదు.. రోజురోజుకూ వైరస్‌ విజృంభిస్తున్న ఈ మూడు జిల్లాల్లోనూ క్వారంటైన్‌, కంటెయిన్‌మెంట్‌ జోన్ల నిర్వహణ అధ్వానంగా ఉందని పేర్కొన్నట్లు తెలిసింది.
ముఖ్యమంత్రి కేసీఆర్ స్పందిస్తూ.. ఈ అంశాలన్నింటిపైనా సమీక్ష జరపాలని, వ్యాధి ఉద్ధృతికి వెంటనే నివారణ చర్యలు చేపట్టాలని ఆదేశించినట్లు తెలిసింది. రాష్ట్రంలో కరోనా గ్రేటర్‌ హైదరాబాద్‌ తర్వాత సూర్యాపేట, గద్వాల, వికారాబాద్‌ల్లో కరోనా తీవ్రత అధికంగా ఉన్న విషయం తెలిసిందే. దీంతో వీటిపై ప్రత్యేక దృష్టి పెట్టిన సీఎం కేసీఆర్ ప్రభుత్వ ప్రధాన కార్యదర్శి సోమేశ్కుమార్, డీజీపీ మహేందర్రెడ్డి, వైద్యఆరోగ్యశాఖ ప్రత్యేక ప్రధాన కార్యదర్శి శాంతికుమారిలను ఆ జిల్లాల్లో పర్యటించి పరిస్థితిని సమీక్షించాలని ఆదేశించారు. ఈ మూడు జిల్లాల్లో పర్యటించిన ఉన్నతాధికారులు బుధవారం రాత్రి హైదరాబాద్‌ చేరుకుని ప్రగతిభవన్‌లో సీఎంను కలిశారు.
ఈ సందర్భంగా జరిగిన సమావేశంలో వైద్య, ఆరోగ్యశాఖ మంత్రి ఈటల రాజేందర్ సైతం పాల్గొన్నారు. ఈ జిల్లాల పరిస్థితులను ముఖ్యమంత్రికి నివేదించారు. మూడు జిల్లాల్లో ప్రత్యేక కార్యాచరణను అమలు చేయాలని సీఎం తెలిపారు. లోటుపాట్లను వెంటనే అధిగమించేందుకు చర్యలు చేపట్టాలన్నారు. అన్ని జిల్లాల్లోనూ తనిఖీలు నిర్వహించాలని సూచించారు. వ్యాధికి సంబంధించి అనుమానితులపై నిఘా ఉంచాలని, వారు ఎవరెవరిని కలిశారనేది ముఖ్యమని, అందరికీ సంబంధించిన సమాచారం తీసుకోవాలన్నారు. అనుమానితుల్లో ఏ ఒక్కరూ తప్పించుకొని తిరగడానికి వీల్లేదన్నారు.
కంటెయిన్‌మెంట్‌ జోన్లపై దృష్టి సారించడం ద్వారా మిగిలిన ప్రాంతాలను విస్మరించొద్దని, జోన్లతో పాటు వాటిని ఆనుకొని ఉన్న ప్రాంతాల్లోనూ పర్యవేక్షణ సాగాలన్నారు. పలుచోట్ల లాక్డౌన్ నిబంధనల ఉల్లంఘనలు జరుగుతున్నాయని, పూర్తిగా నివారించాలన్నారు. జన సంచారాన్ని పూర్తిగా నిరోధించాలని ముఖ్యమంత్రి కేసీఆర్ సూచించారు.