భారీగా నిధులు ఇవ్వండి

తెలంగాణ ప్రభుత్వం 15వ ఆర్థిక సంఘం ముందు రాష్ట్ర అవసరాలు నివేదించేందుకు సర్వం సిద్ధం చేసింది. రాష్ట్ర సంక్షేమ పథకాలు, నీటిపారుదల ప్రాజెక్టులను కమిటీకి సీఎం ప్రాధమికంగా వివరించనున్నారు. అనంతరం ఆర్థికశాఖ ముఖ్య కార్యదర్శి రామకృష్ణారావు పవర్‌ పాయింట్‌ ప్రజంటేషన్‌ ద్వారా నిధుల ఆవశ్యకత తెలియచేస్తారు.

ఛైర్మన్‌ ఎన్‌.కె. సింగ్‌ నేతృత్వంలో రాష్ట్రంలో పర్యటిస్తున్న 15వ ఆర్థిక సంఘం ఇవాళ సీఎం కేసీఆర్‌తో సమావేశం కానుంది. జూబ్లీహాలులో మధ్యాహ్నం ఒంటిగంటకు ఆర్థిక సంఘంతో కేసీఆర్‌ భేటీ అవుతారు. భోజనం అనంతరం రెండు గంటలకు రాష్ట్రంలో ఆర్థిక పరిస్థితులు వివరిస్తారు. 2.50 గంటలకు ఆర్థిక శాఖ ముఖ్యకార్యదర్శి రామకృష్ణారావు పవర్‌పాయింట్‌ ప్రజంటేషన్‌ చేస్తారు.

నిధుల ఆవశ్యకతపై వివరణ
3.30 నుంచి సాయంత్రం 4.30 గంటల వరకు నీటిపారుదల శాఖ ముఖ్య కార్యదర్శి సీఎస్‌ జోషి మిషన్‌ కాకతీయపై పవర్‌పాయింట్‌ ప్రజంటేషన్‌ ద్వారా వివరిస్తారు. సాయంత్రం 4.30 నుంచి 5 గంటల వరకు సాధారణ చర్చ ఉంటుంది. సాగు, తాగు నీరు, స్థానిక సంస్థలు, పారిశుధ్యం, మౌలిక సదుపాయాలు, హరితహారం తదితర అంశాల్లో సహకారం అందించాలని ప్రభుత్వం కోరనుంది.
అవసరాలు, ప్రాధాన్యత దృష్టిలో ఉంచుకొని ఆర్థిక సంఘానికి అందించేందుకు సమగ్ర నివేదికను రాష్ట్ర ఆర్థిక శాఖ అధికారులు సిద్ధం చేశారు. అనంతరం రాత్రి 9.30 గంటలకు దిల్లీకి తిరుగు ప్రయాణమవుతారు.