Revanth Arrest: 'చలో రాజ్‌భవన్‌'లో ఉద్రిక్తత.. రేవంత్​రెడ్డి అరెస్ట్​

13:39 July 16

'చలో రాజ్‌భవన్‌'లో ఉద్రిక్తత.. రేవంత్​రెడ్డి అరెస్ట్​

పెట్రోల్​ ధరల పెంపునకు నిరసనగా కాంగ్రెస్ తలపెట్టిన 'చలో రాజ్‌భవన్‌' కార్యక్రమంలో ఉద్రిక్తత నెలకొంది. రాజ్‌భవన్‌కు బయలుదేరిన కాంగ్రెస్ ర్యాలీని పోలీసులు అడ్డుకున్నారు. గవర్నర్‌ అందుబాటులో లేరని.. వినతిపత్రాన్ని ఈ-మెయిల్ ద్వారా పంపాలని పోలీసులు సూచించారు. 

అంబేడ్కర్ విగ్రహం వరకు ర్యాలీగా వెళ్తామని చెప్పి అటువైపుగా కాంగ్రెస్​ శ్రేణులు బయలుదేరాయి. అప్రమత్తమైన పోలీసులు.. ర్యాలీని అడ్డుకున్నారు. ఈ సమయంలో పోలీసులు, కాంగ్రెస్ శ్రేణులకు మధ్య వాగ్వాదం, తోపులాట చోటుచేసుకున్నాయి. తోపులాటలో పలువురు పోలీసులు కిందపడిపోయారు.  

అనంతరం పెద్దఎత్తున నినాదాలు చేసుకొంటూ బారికేడ్లు తోసేందుకు కాంగ్రెస్ శ్రేణులు యత్నించారు. బారికేడ్లు, ఇనుప ముళ్ల కంచెలతో కాంగ్రెస్​ శ్రేణులను పోలీసులు నిలువరించేందుకు యత్నించారు. కార్యకర్తల భుజాలపైకి ఎక్కిన పీసీసీ అధ్యక్షుడు రేవంత్​రెడ్డి.. మోదీ ప్రభుత్వానికి వ్యతిరేకంగా ఉన్న ప్లకార్డును ప్రదర్శించారు. అనంతరం కార్యకర్తల భుజాల నుంచే బారికేడ్లు దూకేశారు. అంతేవేగంగా అప్రమత్తమైన పోలీసులు.. రేవంత్​ను అరెస్ట్​ చేశారు.  

అయితే రేవంత్​ను తీసుకెళ్తున్న వాహనాన్ని.. కాంగ్రెస్​ శ్రేణులు అడ్డుకొనేందుకు యత్నించాయి. వారందరినీ పక్కకు నెట్టిన పోలీసులు.. పీసీసీ అధ్యక్షుడిని అంబర్​పేట పోలీస్​ స్టేషన్​కు తరలించారు.  

ఇవీచూడండి:Revanth Reddy: 'అబద్ధాలతో మభ్యపెట్టి కేసీఆర్ రెండుసార్లు సీఎం అయ్యారు'​