Covid effect on families: కొవిడ్​తో కన్నవారు దూరమై.. చిన్నారులకు ఆర్థిక భరోసా కరవై

Covid effect on families: కరోనా మహమ్మారి ఎంతో మంది జీవితాల్లో కల్లోలం రేపింది. ఎంతో మందికి ఆత్మీయులను దూరం చేసింది. పేద కుటుంబాలు, చిన్నారులపై మహమ్మారి తీవ్ర ప్రభావం చూపింది. తల్లిదండ్రుల సంరక్షణలో హాయిగా పెరిగిన పసివాళ్లకు.. కన్నవారిని దూరం చేసి వారిని తీరని వేదనను మిగిల్చింది. వెనక ఆస్తిపాస్తులు లేక ఆర్థిక భరోసా కరవై తల్లడిల్లుతున్నారు. దీంతో వారి ఆలనాపాలనా చూసే వారు కరవై.. దాతల సాయం కోసం ఎదురుచూస్తున్నారు.

Covid effect on families: విధి బలీయమైంది.. రోజుల వ్యవధిలోనే తల్లిదండ్రుల్ని దూరంచేసి వారికి పరీక్ష పెట్టింది. కొందరు కరోనాతో కన్నవారిని కోల్పోగా.. అనారోగ్యం, రోడ్డుప్రమాదాల కారణంగా అయినవారు మృత్యువాత పడడంతో మరికొందరు అనాథలుగా మారి అవస్థలు పడుతున్నారు. అల్లారుముద్దుగా పెంచిన తల్లిదండ్రులు దూరమవ్వడంతో.. ఆ పిల్లల వ్యథ అంతా ఇంతా కాదు. తమ ఎదుగుదల చూసేవరకైనా తోడులేరనే బాధ వారిని నిత్యం వేధిస్తోంది. కరోనా కారణంగా గ్రేటర్‌ పరిధిలో సుమారు 655 మందికి పైగా పిల్లలు తల్లి లేదా తండ్రిని కోల్పోగా.., మరో 35 మంది ఇద్దరినీ కోల్పోయి అనాథలుగా మారారు. వారిలో కొందరు సవాళ్లను ఎదుర్కొంటూ ముందుకు సాగుతుంటే.. మరికొందరు ప్రభుత్వం, దాతల ఆర్థిక సాయం కోసం ఆశగా ఎదురుచూస్తున్నారు. సాయం చేయాలను కునేవారు 80080 55788 చరవాణి నంబరులో సంప్రదించగలరు.

ఎంబీఏ చేద్దామనుకున్నా కానీ..

వారం రోజుల వ్యవధిలో తల్లిదండ్రులు దూరమయ్యారు. చెల్లెలిని, నన్ను ఉన్నత ఉద్యోగాల్లో చూడాలన్నదే వారి కోరిక. అది తీరకుండానే వారు మా నుంచి భౌతికంగా వెళ్లిపోయారు. నేను డిగ్రీ పూర్తి చేశాను. ఎంబీఏ చేయాలని భావించినా ఆర్థిక ఇబ్బందులతో సాధ్యపడలేదు. ప్రస్తుతం ఓ ఫైనాన్స్‌ కంపెనీలో ఉద్యోగం చేస్తున్నా. ఇంటర్మీడియట్‌ పూర్తిచేసిన చెల్లెలు హర్షిత ఉన్నత చదువులకు వీలుగా సాయమందించాలని కోరుతున్నా. -సుస్మిత, ఏఎస్‌రావునగర్‌

కన్న కుమార్తెలతో సమానంగా..

ఆ కుటుంబ పెద్దను రోడ్డు ప్రమాదం బలితీసుకుంటే.. తల్లి అనారోగ్యంతో మృతి చెందింది. దీంతో యూసుఫ్‌గూడకు చెందిన ఇద్దరు చిన్నారులు అక్షయ, కీర్తన అనాథలుగా మారారు. ఆదుకునేందుకు సొంతవారు ఎవరూ ముందుకు రాలేదు. స్థానికంగా ఉండే ఫ్రాన్సిస్‌ (సెక్యూరిటీ గార్డు) మనసు కరిగింది. ఆయనకు ఇద్దరు కుమార్తెలు ఉన్నా వెనకడుగు వేయకుండా.. అక్షయ, కీర్తనల యోగక్షేమాలనూ చూసుకోవాలని నిర్ణయించుకున్నాడు. వారిద్దరికి భోజన సౌకర్యం, వసతి సమకూరుస్తానని, చదువులకు మాత్రం ప్రభుత్వపరంగా ఆర్థిక సాయం అందించాలంటూ విజ్ఞప్తి చేస్తున్నారు.

ఇబ్బందుల్లేకుండా చూడాలి

నాలుగు రోజుల వ్యవధిలో తల్లిదండ్రులు దూరమవడంతో.. ప్రస్తుతం పెద్దమ్మ ఇంట్లో ఉంటున్నాం. ఓ ప్రైవేటు పాఠశాలలో.. నేను పదో తరగతి, చెల్లెలు సోనిక 8వ తరగతి చదువుతోంది. చదువుల ఖర్చును పెద్దమ్మ కుటుంబమే భరిస్తోంది. భవిష్యత్తులో మా ఇద్దరి చదువులకు ఆటంకం లేకుండా ప్రభుత్వం సాయం చేయాలి. - కె.త్రిషిత, నాగారం, శంషాబాద్‌

ఇదీ చదవండి:Suicide Attempt: ప్రియుడితో కలిసి విషం తాగిన వివాహిత.. పరిస్థితి విషమం