ప్రారంభమైన తెదేపా 'మహానాడు'.. జెండాను ఆవిష్కరించిన అధినేత

తెదేపా మహానాడు కార్యక్రమం ప్రారంభమైంది. రెండు రోజుల పాటు జరగనున్న ఈ కార్యక్రమం అంతా జూమ్ యాప్ ద్వారా సాగనుంది. ఆంధ్రప్రదేశ్​ అమరావతిలోని పార్టీ కార్యాలయంలో చంద్రబాబు నాయుడు పతాకావిష్కరణ చేశారు. ఎన్టీఆర్‌కు నివాళులర్పించారు.

తెదేపా నాయకులు, కార్యకర్తలు పెద్ద పండుగలా భావించే ‘మహానాడు’ ప్రారంభమైంది. ఆంధ్రప్రదేశ్​లోని ఎన్టీఆర్ భవన్​లో ఆ పార్టీ అధినేత చంద్రబాబు.. జెండాను ఆవిష్కరించారు. 2 రోజుల పాటు నిర్వహించే కార్యక్రమంలో రోజుకు పది చొప్పున 20 తీర్మానాలను ప్రవేశపెట్టనున్నారు.

దేశంలోనే తొలిసారి...

కరోనా వ్యాప్తి దృష్ట్యా... పార్టీ చరిత్రలో తొలిసారిగా ‘వర్చువల్‌ మహానాడు’ జరగనుంది. ఉభయ తెలుగు రాష్ట్రాలు, విదేశాల్లోని పార్టీ ఎన్‌ఆర్‌ఐ విభాగానికి చెందిన నాయకులు, కార్యకర్తలు సుమారు 14 వేల మంది జూమ్‌ యాప్‌ ద్వారా భాగస్వాములవుతున్నారు. యూట్యూబ్‌, ఫేస్‌బుక్‌ లైవ్‌ ద్వారా మరో 10 వేల మంది కార్యక్రమాన్ని వీక్షించేలా ఏర్పాట్లు చేశారు. ఒక రాజకీయ పార్టీ... ఇన్ని వేల మంది నాయకుల్ని, కార్యకర్తల్ని భాగస్వాముల్ని చేస్తూ ఆన్‌లైన్‌లో ఇలాంటి కార్యక్రమం నిర్వహించడం దేశంలో ఇదే మొదటిసారి.

ఇవీ చూడండి:కరోనా వేళ కూలీల ఆశాదీపం 'ఉపాధిహామీ'