Telangana Police Trace Lost Cell Phones : చోరీకి గురైన, పొగొట్టుకున్న చరవాణులను పోలీసులు కొత్త సాంకేతికత ఉపయోగించి గుర్తిస్తున్నారు. ఇలా నెల రోజుల వ్యవధిలోనే 1,000 సెల్ఫోన్లను గుర్తించి, సంబంధిత యజమానులకు అందించారు. సెంట్రల్ ఎక్విప్మెంట్ ఐడెంటిటీ రిజిస్ట్రర్ పోర్టల్ను టెలికాంశాఖ గత నెల అందుబాటులోకి తీసుకొచ్చింది. ప్రయోగాత్మకంగా తెలంగాణ రాష్ట్రాన్ని ఎంపిక చేసుకొని ఆ సాంకేతికతను గత నెల 19వ తేదీ నుంచి ఇక్కడ ఉపయోగించారు.
4226 ఫోన్లు రికవరీ చేశారు : సీఐడీ అదనపు డీజీ మహేశ్‌భగవత్ నేతృత్వంలో రాష్ట్రంలో 780 పోలీస్‌స్టేషన్లలో ఈ సాంకేతికతను ఉపయోగిస్తున్నారు. నెల వ్యవధిలో 16,000ల చరవాణులు పోయినట్లు ఫిర్యాదులు రాగా.. అందులో 4,226ఫోన్లను రికవరీ చేశారు. వీటిలో 1,000 మొబైల్ ఫోన్లను యజమానులకు అప్పగించారు. సెల్ఫోన్లు చోరీకి గురైనా లేదంటే ఎక్కడైనా పడేసుకున్నా మీ సేవ, పోలీస్‌స్టేషన్లకు వెళ్లి ఫిర్యాదు చేసే అవసరం లేకుండా సీఈఐఆర్ పోర్టల్లో దరఖాస్తు చేసుకోవచ్చని పోలీసులు చెబుతున్నారు.
క్షణాల్లో ఫోన్ ఎక్కడ ఉందో తెలుస్తుంది : మొబైల్ ఫోన్ కనిపించలేదని కంగారుపడాల్సిన అవసరం లేదు.. పోయిందని బాధ పడాల్సిన పని లేదు. చరవాణి ఎక్కడ ఉన్నా.. క్షణాల్లో అదెక్కడ ఉందో పోలీసులు గుర్తిస్తున్నారు. కేంద్రం ప్రత్యేకమైన రూపొందించిన పోర్టల్ను ఉపయోగించి.. లోకేషన్ని కనిపెడుతున్నారు. దేశవ్యాప్తంగా ఈ పోర్టల్ సేవలను ఈ నెల 17 నుంచి అందుబాటులోకి తీసుకువచ్చింది. ఈ 'https://sancharsaathi.gov.in' అనే వెబ్ పోర్టల్ను సెంటర్ ఫర్ డిపార్ట్‌మెంట్ ఆఫ్ టెలిమాటిక్స్ తయారు చేసింది.
అప్లికేషన్ ఎలా నింపాలి : మొబైల్ పోగొట్టుకున్న వ్యక్తి ముందుగా సంచార్ సాథీ పోర్టల్లో అప్లికేషన్ నింపాల్సిన అవసరం ఉంది. ఫోన్ నెంబర్, ఐఎంఈఐ, ఫోన్ బ్రాండ్ పేరు, మొబైల్ పోగోట్టుకున్న ప్రదేశం, తేదీ, జిల్లా, రాష్ట్రం, దగ్గర పోలీస్ స్టేషన్, పోలీస్ స్టేషన్లో ఫిర్యాదు చేసిన సంఖ్య వీటిని అప్లికేషన్లో నింపాలి. అనంతరం పోలీస్ స్టేషన్ ఫిర్యాదు చేసిన డాక్యుమెంట్ను అప్లోడ్ చేయాలి. ఫోన్ పోగోట్టుకున్న వ్యక్తి చిరునామా ఇవ్వాలి. చివరిగా క్యాప్చా ఫిల్ చెయ్యాలి. తరవాత ఒటీపీ వస్తుంది. అది ఎంటర్ చేస్తే వివరాలు తెలుసుకోవచ్చు.
ఇవీ చదవండి:
