Telangana National Unity Vajrotsavam: ఏడాది పాటు నిర్వహిస్తున్న తెలంగాణ జాతీయ సమైక్యతా వజ్రోత్సవ వేడుకల్లో భాగంగా మూడు రోజుల ప్రారంభోత్సవ సంబురాలు వైభవంగా జరిగాయి. నిజామాబాద్‌లో నిర్వహించిన తెలంగాణ జాతీయ సమైక్యతా వజ్రోత్సవ కార్యక్రమంలో రోడ్లు భవనాల శాఖ మంత్రి ప్రశాంత్ రెడ్డి పాల్గొన్నారు. కవులు, కళాకారులను ఆయన సన్మానించారు. రాష్ట్రంపై గజనీ మహమ్మద్ లాగా భాజపా నేతలు దండెత్తుతున్నారని మంత్రి ప్రశాంత్ రెడ్డి ఆరోపించారు. తెలంగాణలో మతాల మధ్య చిచ్చు పెట్టడం మానుకోవాలని హెచ్చరించారు. కేంద్ర హోంశాఖ మంత్రి అమిత్‌ షా తీరును తప్పుపట్టారు. కేంద్రంలో ఎప్పటికీ భాజపా ప్రభుత్వమే ఉండదని గుర్తుంచుకోవాలని ప్రశాంత్ రెడ్డి హితవు పలికారు.
తెలంగాణ తొలి, మలి దశ ఉద్యమాన్ని నడిపింది కవులు, కళాకారులేనని విద్యాశాఖ మంత్రి సబితా ఇంద్రారెడ్డి స్పష్టం చేశారు. తెలంగాణ దాస్యశృంఖలాల నుంచి విముక్తి కోసం ప్రాణాలొడ్డిన అమరులను స్మరించుకోవడం అందరి బాధ్యతని తెలిపారు. రంగారెడ్డి జిల్లా కలెక్టరేట్‌లో జరిగిన వజ్రోత్సవ వేడుకల్లో ఆమె పాల్గొన్నారు. అందులో భాగంగా స్వాతంత్ర సమరయోధులను ఘనంగా సన్మానించారు. విద్యార్థుల సాంస్కృతిక కార్యక్రమాలు ఆద్యంతం అలరించాయి.
సంగారెడ్డి జిల్లా కలెక్టరేట్‌లో మాజీ ఎమ్మెల్యే చింతా ప్రభాకర్‌, కలెక్టర్‌ శరత్‌ తెలంగాణ జాతీయ సమైక్యతా వజ్రోత్సవాల్లో పాల్గొన్నారు. విద్యార్థులు ప్రదర్శించిన కళారూపాలు ఆకట్టుకున్నాయి. మెదక్‌లో నిర్వహించిన వేడుకల్లో పాల్గొన్న ఎమ్మెల్యే పద్మా దేవేందర్‌ రెడ్డి పాల్గొన్నారు. మన భాషా, సంస్కృతికి అద్దం పట్టేలా వజ్రోత్సవాలు మూడురోజుల పాటు ఘనంగా జరిగాయని ఆమె అన్నారు. ఈ వేడుకల్లో విద్యార్థుల పోతురాజుల వేషధారణలు, బతుకమ్మ,బోనాలు లాంటి కళారూపాలతో సందడి చేశారు. ఎమ్మెల్యే పద్మాదేవేందర్ రెడ్డి బడి పిల్లలతో పాదం కదిపారు.