'వజ్ర'లను అమ్మే యోచనలో ప్రభుత్వం...!

వజ్ర... ఈ పేరును వినే ఉంటారు. ఆర్టీసీ ఏసీ సర్వీసుల పేరుతో చేసిన ప్రయోగమే ఈ వజ్ర బస్సులు. వీటిని ఎక్కడానికి ఏ ఒక్కరూ ముందుకు రాకపోయేసరికి... ఈ బస్సులను అటకెక్కించారు. ప్రయాణికులకు సౌకర్యవంతమైన సేవలిద్దామని చేసిన ప్రయోగం బెడిసి కొట్టటం వల్ల... వజ్ర బస్సులను కొనసాగించాలా... వద్దా అనే ఆలోచనలో ప్రభుత్వం పడింది.

ఇళ్ల వద్దనే ప్రయాణికులను ఎక్కించుకునేందుకు వీలుగా వంద మిని బస్సులు కొనుగోలు చేయాలని గతంలో సీఎం కేసీఆర్ సూచించారు. వజ్ర పేరిట 2017లో ఆ బస్సులు ఆర్టీసీకి చేరాయి. వరంగల్, కామారెడ్డి, నిజామాబాద్, రంగారెడ్డి, హైదరాబాద్​లోని 3 డిపోల నుంచి వజ్ర బస్సులను నడిపారు. కానీ.. ఆశించిన స్థాయిలో ప్రజల ఆదరణ లభించలేదు.

పెట్టుబడిలో 30శాతం కూడా రాలేదు...

నష్టాలు వచ్చే రూట్లలో బస్సులను నియంత్రించాలని సీఎం కేసీఆర్ తాజాగా స్పష్టం చేయటం వల్ల... వజ్ర బస్సులకు బ్రేక్​ పడే అవకాశాలు కనిపిస్తున్నాయి. ఒక్కో బస్సును రూ.20 లక్షలతో కొనుగోలు చేయగా.. ఇప్పటి వరకూ ఒక్కో బస్సు 3 లక్షల కిలోమీటర్లు మేర మాత్రమే నడిచినట్లు సమాచారం. వజ్ర బస్సులపై పెట్టిన పెట్టుబడిలో 30 శాతం కూడా రాలేదని సమాచారం.

అమ్మాలా వద్దా.. త్వరలోనే నిర్ణయం...

వజ్ర బస్సులను హైదరాబాద్ ఐటీ కారిడార్​లో నడపాలని ప్రభుత్వం యోచిస్తోంది. మిగిలిన బస్సులను విక్రయించాలా లేక లీజుకు ఇవ్వాలా అనే అంశంపై ఉన్నతస్థాయి కమిటీ అధ్యయనం చేస్తోంది. ఈ నెలాఖరులోగా నివేదిక తమకు అందుతుందని రవాణా శాఖ మంత్రి పువ్వాడ అజయ్ కుమార్ తెలిపారు. మినీ బస్సులను నడపడం వల్ల ఉపయోగంలేదని కమిటీ తెలిస్తే విక్రయించేందుకు సిద్ధమని పేర్కొన్నారు.

ఇదీ చూడండి:భవననిర్మాణాలకు 21 రోజుల్లో అనుమతివ్వాలి: కేటీఆర్