ప్రభుత్వాస్పత్రుల్లో సిబ్బంది, సౌకర్యాలపై సమీక్షకు మంత్రివర్గ ఉపసంఘం

కొవిడ్ మూడో దశను ఎదుర్కొనేందుకు పూర్తి స్థాయిలో సిద్ధంగా ఉండాలని.. అవసరమైన మౌలిక సదుపాయాలు, సిబ్బంది, ఔషధాలను సమకూర్చుకోవాలని వైద్య, ఆరోగ్యశాఖకు రాష్ట్ర మంత్రివర్గం స్పష్టం చేసింది. ప్రభుత్వ ఆసుపత్రుల స్థితిగతులు, మెరుగైన సౌకర్యాలు, సిబ్బంది సమీక్ష కోసం ఆర్థికశాఖ మంత్రి హరీశ్​ రావు అధ్యక్షతన ఉప సంఘాన్నిఏర్పాటు చేశారు. సత్తుపల్లి, మధిరలో వంద పడకల ఆసుపత్రుల ఏర్పాటు, సూర్యాపేట ఎంసీహెచ్​ స్థాయిని 200 పడకలకు పెంచాలని తీర్మానించింది. సిరిసిల్ల, ములుగు జిల్లాల్లో హెల్త్ ప్రొఫైల్ పైలట్ ప్రాజెక్టు చేపట్టాలని నిర్ణయించింది.

వైద్య, ఆరోగ్యశాఖకు సంబంధించిన అంశాలపై మంత్రివర్గం సుదీర్ఘంగా చర్చించింది. కొవిడ్‌ మూడోవేవ్‌ వచ్చే అవకాశం ఉందంటున్న హెచ్చరికల నేపథ్యంలో పూర్తి స్థాయిలో సన్నద్ధం కావాలని కేబినెట్ ఆదేశించింది. అవసరమైన ముందస్తు చర్యలు చేపట్టాలని.. సరిపడా మౌలిక వసతులు, సిబ్బంది, ఔషధాలను సమకూర్చుకోవాలని స్పష్టం చేసింది. ప్రభుత్వ ఆస్పత్రుల స్థితిగతులు, మెరుగైన సౌకర్యాలు, సిబ్బంది, ఇతర మౌలిక సౌకర్యాలను సమీక్షించేందుకు మంత్రివర్గ ఉపసంఘాన్ని నియమించింది. ఆర్థికశాఖ మంత్రి హరీశ్‌రావు అధ్యక్షతన ఏర్పాటైన ఉపసంఘంలో మంత్రులు జగదీశ్ రెడ్డి, తలసాని శ్రీనివాస్ యాదవ్, ప్రశాంత్ రెడ్డి, శ్రీనివాస్‌గౌడ్, సబితా ఇంద్రారెడ్డి, సత్యవతి రాఠోడ్‌ సభ్యులుగా ఉంటారు. దేశంలో అత్యుత్తమ వైద్య సేవలందిస్తున్న తమిళనాడు, కేరళ రాష్ట్రాలతో పాటు శ్రీలంకకు కూడా వెళ్లి అధ్యయనం చేసి సమగ్ర నివేదిక అందించాలని సబ్ కమిటీని కేబినెట్ ఆదేశించింది. వైద్య, ఆరోగ్య రంగంలో రాష్ట్రాన్ని అగ్రగామిగా నిలిపేందుకు అహర్నిశలు కృషి చేయాలని శాఖను ఆదేశించింది.

సత్తుపల్లి, మధిరల్లో కొత్తగా వంద పడకల ఆసుపత్రులను నిర్మించి.. ప్రస్తుతం ఉన్న వాటిని మాతా, శిశు సంరక్షణ కేంద్రాలుగా వినియోగించుకోవాలని నిర్ణయించింది. సూర్యాపేటలో ఇపుడున్న 50 పడకల మాతా, శిశు సంరక్షణా కేంద్రాన్ని 200 పడకలకు పెంచాలని కేబినెట్‌ తీర్మానించింది. రాష్ట్రంలోని అన్ని ఆసుపత్రుల్లో రోగుల సహాయార్ధం వచ్చే వారి కోసం వసతి కేంద్రాలు ఏర్పాటుకు.. తక్షణం చర్యలు చేపట్టాలని వైద్యశాఖను మంత్రివర్గం ఆదేశించింది. తెలంగాణ హెల్త్ ప్రొఫైల్ కార్యక్రమాన్ని ములుగు, సిరిసిల్ల జిల్లాల్లో పైలట్ ప్రాజెక్టుగా ప్రారంభించాలని కేబినెట్ నిర్ణయించింది. 19 డయాగ్నోస్టిక్స్ కేంద్రాలతో పాటు మిగతా అన్ని జిల్లా కేంద్రాల్లోనూ వీటిని ఏర్పాటు చేయాలని నిర్ణయించారు. అన్ని జిల్లాల్లోని డయాగ్నస్టిక్ కేంద్రాల్లో ఈసీజీ, డిజిటల్ ఎక్స్ రే, అల్ట్రాసౌండ్, టూడీ ఎకోతో పాటు మహిళల కాన్సర్ స్క్రీనింగ్ కోసం ‘మామో గ్రామ్’ యంత్రాలను ఏర్పాటు చేయాలని నిర్ణయించారు. అలర్జీ జబ్బుల పరీక్షలు, చికిత్స కోసం హైదరాబాద్, వరంగల్, సిద్దిపేట, మహబూబ్‌నగర్‌లో ప్రత్యేక కేంద్రాలు ఏర్పాటు చేయాలని మంత్రివర్గం నిర్ణయించింది. ప్రస్తుత డయాలసిస్ కేంద్రాల్లో అదనపు యంత్రాలతో పాటు కొత్తగా మరికొన్ని కేంద్రాల ఏర్పాటుకు కేబినెట్‌ ఆమోదం తెలిపింది. క్యాన్సర్ రోగులకు జిల్లా కేంద్రాల్లోనే కీమో, రేడియో థెరపీ కోసం అవసరమైన మౌలిక వసతులతో జిల్లా క్యాన్సర్ కేంద్రాలు ఏర్పాటు చేయాలని మంత్రివర్గం నిర్ణయించింది.

ఎయిమ్స్ తరహా ఆసుపత్రి..

అన్ని ఆసుపత్రుల్లో అవసరాలకు సరిపడా రక్తనిధి కేంద్రాలను ఆధునీకరించాలని, అవసరమైన మేరకు కొత్త కేంద్రాలను ఏర్పాటు చేయాలని కేబినెట్ లో నిర్ణయం తీసుకున్నారు. ఆర్థోపెడిక్, న్యూరాలజీ తదితర ప్రత్యేక విభాగాల్లో మెరుగైన వైద్య సేవలకోసం కావాల్సిన మౌలిక వసతులను కల్పించి, అవసరమైన మేరకు సిబ్బందిని నియమించాలని వైద్య,ఆరోగ్యశాఖను కేబినెట్ ఆదేశించింది. వరంగల్ లో ఖాళీ చేస్తున్న జైలు ప్రదేశంలో ఎయిమ్స్ తరహా ఆసుపత్రి ఏర్పాటు చేసి అన్ని రకాల స్పెషాలిటీ, సూపర్ స్పెషాలిటీ సేవలు అందించాలని నిర్ణయించింది. రాష్ట్రంలోని అన్ని ఆసుపత్రుల్లో ఎండీ - హాస్పిటల్ అడ్మిస్ట్రేషన్ కోర్సు అభ్యసించిన అర్హులైన వారిని నియమించుకుని ఆసుపత్రుల పరిపాలన, నిర్వహణ కోసం వినియోగించాలని మంత్రివర్గం నిర్ణయించింది. నర్సింగ్, మిడ్ వైఫరీ కోర్సులు, లాబ్, రేడియాలజీ, డయాలసిస్ టెక్నిషియన్ తదితర ప్రత్యేక నైపుణ్య కోర్సులను అవసరమైన మేరకు ప్రభుత్వ ఆసుపత్రుల్లోని వైద్యకళాశాలల్లో అందుబాటులోకి తీసుకురావాలని వైద్య, ఆరోగ్యశాఖను మంతివర్గం ఆదేశించింది.

మూడో నెల నుంచే సమతుల పౌష్టికాహార కిట్లు..

మాతా, శిశు సంరక్షణకు సంబంధించిన వైద్య సేవలను మరింతగా పటిష్టం చేయాలని నిర్ణయించిన కేబినెట్.. ఇతర రోగులతో కలపకుండా తల్లీబిడ్డలకు ప్రత్యేకంగా వైద్యసేవలు అందించాలని తెలిపింది. మాతా, శిశు సంరక్షణ కేంద్రాలను ప్రధాన ఆసుపత్రి ఉన్న భవనంలో కాకుండా ప్రత్యేక భవనంలో ఏర్పాటు చేయాలని పేర్కొంది. అవసరమైన మేరకు ప్రత్యేకంగా భవనాలు నిర్మించి వసతులు కల్పించాలని ఆదేశించింది. ఆ భవనంలోనే హైరిస్క్​ ప్రసవాలు అవవసరమయ్యే గర్భిణుల వైద్యసేవలం కోసం ప్రత్యేక మెటర్నల్ ఐసీయూలు, నవజాత శిశువుల కోసం ఎస్​ఎన్​సీయూలను ఏర్పాటు చేయాలని స్పష్టం చేసింది. గర్భం దాల్చిన మూడో నెల నుంచి గర్భిణులకు సమతుల పౌష్టికాహార కిట్లను అందించాలని నిర్ణయించారు.