ప్రగతిపద్దుకు వేళాయే...

రాష్ట్ర బడ్జెట్​ను సీఎం కేసీఆర్ నేడు​ శాసన సభలో ప్రవేశపెట్టనున్నారు. పద్దుపై సాధారణ చర్చ శనివారం ఉంటుంది. అనంతరం ద్రవ్య వినిమయ బిల్లుకు ఆదివారం ఆమోదం పొందేలా చూడాలని ప్రభుత్వం నిర్ణయించింది.

రాష్ట్ర బడ్జెట్ సమావేశాలు ఇవాళ్టి నుంచి ప్రారంభం కానున్నాయి. ఉదయం 11.30 గంటలకు ఉభయ సభలు సమావేశమవుతాయి. పుల్వామాలో ఉగ్రదాడిలో అమరులైన జవాన్లకు సంతాప తీర్మానాన్ని శాసనసభలో ముఖ్యమంత్రి కేసీఆర్​, మండలిలో హోమంత్రి మహమూద్​ అలీ ప్రవేశపెట్టనున్నారు. కాసేపు వాయిదా అనంతరం 2019-20 ఆర్థిక సంవత్సరానికి ఓటాన్​ అకౌంట్​ బడ్జెట్​ను శాసన సభలో సీఎం ప్రవేశపెట్టనున్నారు. శాసన మండలిలో వైద్య, ఆరోగ్య శాఖ మంత్రి ఈటల రాజేందర్ ​ ప్రవేశపెడతారు. ఈ ఆర్థిక సంవత్సరానికి అనుబంధ వ్యయాన్ని కూడా ప్రభుత్వం ఉభయ సభల ముందు ఉంచనుంది.
రెండో శాసనసభ కొలువు తీరిన నేపథ్యంలో సభా వ్యవహారాల సలహా సంఘాన్ని శాసనసభాపతి పోచారం శ్రీనివాసరెడ్డి ఇవాళ ప్రకటిస్తారు. బడ్జెట్​ ప్రవేశపెట్టిన అనంతరం శాసన సభ, మండలి బీఏసీలు సమావేశమవుతాయి. ఈ భేటీలో ఎజెండాను ఖరారు చేస్తారు.
రెండు బిల్లులకుఆమోదం
పంచాయతీ రిజర్వేషన్ల శాతాన్ని 50 శాతానికి పరిమితం చేస్తూ పంచాయతీరాజ్ చట్ట సవరణ ఆర్డినెన్స్ స్థానంలో ఒక బిల్లును, జీఎస్టీ చట్ట సవరణకు సంబంధించిన మరో బిల్లును ప్రభుత్వం ఈ సమావేశాల్లో ఆమోదం కోసం ఉంచనుంది.

ఇవీ చదవండి:రైతు'బంధు'వు కేసీఆర్