రైతులు పండించిన పంటలకు మద్దతు ధర లభించే విధంగా చర్యలు తీసుకుంటున్నామని హరీశ్‌రావు తెలిపారు. వరి, పత్తి, మొక్కజొన్న, కందులు, వివిధ పంటల కొనుగోలు కోసం భారీగా కేంద్రాలు ఏర్పాటు చేశామన్నారు. ఎంత ఖర్చయినా సరే మొత్తం కందులు కొనుగోలు చేస్తామని స్పష్టం చేశారు. మార్కెట్ ఇంటర్వెన్షన్ ఫండ్ కోసం రూ.1,000 కోట్లు కేటాయించినట్లు పేర్కొన్నారు.
విత్తనాల రాయితీ కోసం రూ.142 కోట్లు అందించామన్న హరీశ్‌.. గోదాముల నిల్వ సామర్థ్యం 22.47 లక్షల మెట్రిక్ టన్నులకు పెంచామని పేర్కొన్నారు. పండ్లు, కూరగాయల సాగులో స్వయం సమృద్ధే సీఎం కేసీఆర్ సంకల్పమని తెలిపారు.
బిందు, తుంపర సేద్యం..
తుంపర సేద్యం కోసం ఎస్సీ, ఎస్టీలకు వందశాతం, బీసీ, సన్న, చిన్నకారు రైతులకు 90 శాతం, ఇతరులకు 80 శాతం రాయితీ ఇస్తున్నామని మంత్రి తెలిపారు. తుంపర సేద్యం పథకం కింద 2,49,200 మంది రైతులకు రూ.1,819 కోట్ల లబ్ధి చేకూర్చామన్నారు. సూక్ష్మ సేద్యం కోసం రూ.600 కోట్లు కేటాయించినట్లు వెల్లడించారు.