'అనవసర అంశాల జోలికొద్దు.. కేసీఆర్​ అవినీతినే ప్రజల్లోకి తీసుకెళ్లండి'

Telangana BJP Leaders Meeting Concluded At Delhi: రాబోయే ఎన్నికల్లో పార్టీ అనుసరించాల్సిన వ్యూహంపై బీజేపీ రాష్ట్ర నాయకత్వానికి హైకమాండ్ దిశానిర్దేశం చేసింది. కేంద్ర హోంమంత్రి అమిత్​ షా, జేపీ నడ్డాలతో దాదాపు గంటన్నర పాటు రాష్ట్రంలో బీజేపీ కార్యాచరణ, పార్టీ వ్యూహాలపై నేతలు చర్చించారు. బీఆర్​ఎస్-కాంగ్రెస్‌ పథకం ప్రకారం తమ పార్టీకి అభ్యర్థులు లేరనే ప్రచారం చేస్తున్నాయని సమావేశం అనంతరం బండి సంజయ్ ధ్వజమెత్తారు. తమకు అన్ని స్థానాల్లో బలమైన అభ్యర్థులు ఉన్నారని స్పష్టం చేశారు.

Telangana BJP Leaders Meeting Concluded At Delhi: దిల్లీలోని జేపీ నడ్డా నివాసంలో కేంద్ర హోంమంత్రి అమిత్ షా, బీజేపీ జాతీయ అధ్యక్షుడు జేపీ నడ్డాలతో తెలంగాణ ముఖ్యనేతల సమావేశం ముగిసింది. కేంద్రం దాదాపు గంటన్నర పాటు రాష్ట్రంలో పార్టీ భవిష్యత్ కార్యాచరణ, వచ్చే ఎన్నికల్లో తెలంగాణలో అనుసరించాల్సిన వ్యూహాలు, ప్రణాళికలపై చర్చించారు. రాష్ట్రంలో కొనసాగుతున్న పార్టీ కార్యక్రమాల గురించి ఆరా తీసిన అధినాయకత్వం... బీజేపీ బలోపేతానికి చేపట్టే కార్యాచరణపై దిశానిర్దేశం చేశారు.

మార్చి 3న రాష్ట్రానికి అమిత్​ షా :మద్యం కుంభకోణం, కేసీఆర్ కుటుంబ పాలనను ప్రజల్లోకి విస్తృతంగా తీసుకెళ్లాలని నేతలకు షా, నడ్డా సూచించారు. ముఖ్య నేతలు ప్రజల్లోకి వెళ్లాలని.. అనవసర అంశాల జోలికి వెళ్లకూడదని అధిష్ఠానం పలు సూచనలు చేసింది. రాష్ట్రంలో కార్యక్రమాలు నిర్వహించేందుకు బండి సంజయ్​కి స్వేచ్ఛనిచ్చినట్లు సమాచారం. మార్చి 3వ తేదీన తెలంగాణకు అమిత్ షా రానున్నట్లు సమాచారం. హైదరాబాద్​లో అధికారిక కార్యక్రమంలో పాల్గొని బీదర్​లో జరిగే పార్టీ కార్యక్రమంలో షా పాల్గొననున్నారు.

మార్చి 22న ప్రధాని మోదీ :అమిత్ షా హైదరాబాద్ పర్యటన నేపథ్యంలో పార్టీ ముఖ్య నేతలతో సమావేశంకానున్నారు. అదే విధంగా మార్చి 22న తెలంగాణకు ప్రధాన మంత్రి నరేంద్ర మోదీ రానున్నట్లు తెలుస్తోంది. కేసీఆర్ సర్కారు వైఫల్యాలను ఎండగట్టేలా కార్యక్రమాలు నిర్వహించాలని నేతలను అధిష్ఠానం ఆదేశించింది. పార్టీని అధికారంలోకి తీసుకు వచ్చేందుకు పాత, కొత్త కలయికతో సమిష్టిగా ప్రజల్లోకి వెళ్లాలని సూచించింది. భేటీ అనంతరం పార్టీ రాష్ట్ర అధ్యక్షుడు బండి సంజయ్, ఇతర నేతలు మీడియాతో మాట్లాడారు.

బీఆర్​ఎస్​కు ప్రత్యామ్నాయం బీజేపీ మాత్రమే: బీఆర్​ఎస్ - కాంగ్రెస్‌ పథకం ప్రకారం తమ పార్టీకి అభ్యర్థులు లేరనే ప్రచారం చేస్తున్నాయని... రాష్ట్రంలో బీజేపీ అధికారంలోకి వచ్చి తీరుతుందని ఆ పార్టీ రాష్ట్ర అధ్యక్షుడు బండి సంజయ్‌ ధీమా వ్యక్తం చేశారు. ఎన్నికలు ఎప్పుడొచ్చినా ఎదుర్కొనేందుకు తమ పార్టీ సిద్ధంగా ఉందని... త్వరలోనే రాష్ట్రంలో భారీ బహిరంగ సభ ఏర్పాటు చేసి, ప్రధానిని ఆహ్వానించనున్నట్లు బండి సంజయ్‌ తెలిపారు. తెలంగాణలో ప్రజలు మార్పు కోరుకుంటున్నారన్నారు. బీఆర్​ఎస్​కు ప్రత్యామ్నాయం బీజేపీ మాత్రమే అని ప్రజలు భావిస్తున్నారని పేర్కొన్నారు. దుబ్బాక, హుజురాబాద్‌ ఫలితాలే ప్రజల ఆలోచనకు నిదర్శనమన్నారు.

'రాష్ట్రంలో మేం చేపట్టిన కార్యక్రమాలపై జాతీయ నాయకత్వం సంతృప్తి వ్యక్తం చేసింది. 119 నియోజకర్గాల్లో ప్రజాగోస కార్యక్రమాలు నిర్వహించాం. బీజేపీకి 119 నియోజకర్గాల్లో బలమైన నేతలు ఉన్నారు. బీజేపీకి అభ్యర్థులు లేరనేది బీఆర్ఎస్ దుష్ప్రచారం. రెండు ఎంపీ సీట్లతో ప్రారంభమైన బీజేపీ ప్రస్థానం నేడు 300 సీట్లు దాటింది. దిల్లీ లిక్కర్‌ కేసుకు, బీజేపీకి సంబంధం లేదు. దిల్లీ లిక్కర్‌ కేసును సీబీఐ దర్యాప్తు చేస్తోంది, దోషులను తేల్చుతుంది.'-బండి సంజయ్, బీజేపీ రాష్ట్ర అధ్యక్షుడు

అప్పుడు కేసీఆర్‌ ఎందుకు స్పందించలేదు: మరోవైపు సీఎం కేసీఆర్​ను ఉద్దేశిస్తూ బండి సంజయ్ తీవ్రంగా విమర్శలు గుప్పించారు. సిసోదియాను అరెస్టు చేస్తే కేసీఆర్‌ స్పందించడంపై ఫైర్ అయ్యారు. లిక్కర్‌ కేసు ఛార్జిషీట్‌లో కవిత పేరును సీబీఐ 4 సార్లు పేర్కొన్నదన్న బండి సంజయ్.. కవిత పేరు ప్రస్తావించినప్పుడు, కుమార్తె కవితకు నోటీసులు ఇస్తే కేసీఆర్‌ ఎందుకు స్పందించలేదని ప్రశ్నించారు. సిసోదియా అరెస్టుకు, తెలంగాణ బీజేపీ రాజకీయాలకు సంబంధం లేదని బండి సంజయ్ అన్నారు.

దిల్లీలోని నడ్డా నివాసంలో జరిగిన ఈ భేటీలో కేంద్ర మంత్రి కిషన్‌రెడ్డి, బీజేపీ రాష్ట్ర వ్యవహారాల బాధ్యుడు తరుణ్ చుగ్, పార్టీ రాష్ట్ర అధ్యక్షుడు బండి సంజయ్, నేతలు లక్ష్మణ్, ఈటల రాజేందర్, అర్వింద్, డీకే అరుణ, విజయశాంతి, వివేక్, రాజగోపాల్‌రెడ్డి, జితేందర్‌రెడ్డి పాల్గొన్నారు.

ఇవీ చదవండి: