తెలంగాణ స్పీకర్ ఎన్నికకు నోటిఫికేషన్ విడుదల

Telangana Assembly Speaker Election Notification Released : మొన్నటి వరకు ఎమ్మెల్యేల ప్రమాణస్వీకారంతో బిజీగా ఉన్న రాష్ట్ర సర్కార్ తాజాగా స్పీకర్​ నియామకంపై దృష్టి పెట్టింది. ఈ మేరకు స్పీకర్​ ఎన్నికకు నోటిఫికేషన్​ విడుదల అయింది. ఈ నెల 14వ తేదీన శాసనసభాపతి ఎన్నిక జరగనుంది.

Telangana Assembly Speaker Election Notification Released : తెలంగాణ రాష్ట్ర శాసనసభాపతి ఎన్నికకు నోటిఫికేషన్​ విడుదల అయింది. ఈనెల 14వ తేదీ ఉదయం 10.30 గంటలకు సభాపతి ఎన్నికను నిర్వహించనున్నారు. అలాగే ఈనెల 13వ తేదీ సభాపతి ఎన్నిక(Speaker Election)కు నామినేషన్లు స్వీకరించనున్నారు. ఈనెల 13న ఉదయం 10.30 గంటల నుంచి సాయంత్రం 5 గంటల వరకు నామినేషన్లును స్వీకరిస్తారు. రాష్ట్రంలో కాంగ్రెస్​ పార్టీ గెలిచి ప్రభుత్వాన్ని ఏర్పాటు చేయగానే అంతకు ముందు ఉన్న శాసనసభాపతి పోచారం శ్రీనివాసరెడ్డి రాజీనామా చేశారు.

ఇప్పటికే అధికార పార్టీ కాంగ్రెస్​ అధిష్ఠానం శాసనసభ స్పీకర్​గా కాంగ్రెస్​ సీనియర్​ నాయకుడు, ఎమ్మెల్యే గడ్డం ప్రసాద్​ కుమార్​(Gaddam Prasad Kumar)ను ఖరారు చేసిన విషయం తెలిసిందే. అందుకే ఆ పార్టీ నుంచి ఆయన ఒక్కరే నామినేషన్​ వేయనున్నట్లు సమాచారం. అనంతరం ఏకగ్రీవంగా గడ్డం ప్రసాద్​నే స్పీకర్​గా ఎన్నుకునే అవకాశం కనిపిస్తోంది. ప్రసాద్​ కుమార్​కు గతంలో ఉమ్మడి రాష్ట్రంలో కిరణ్​కుమార్​ రెడ్డి ప్రభుత్వంలో మంత్రిగా పని చేసిన అనుభవం ఉంది. అలాగే ఇటీవల జరిగిన అసెంబ్లీ ఎన్నిక(Telangana Assembly Election 2023)ల్లో గడ్డం ప్రసాద్​ వికారాబాద్​ నుంచి ఎమ్మెల్యేగా గెలుపొందారు.

Telangana Legislative Assembly : రాష్ట్రంలో కాంగ్రెస్​ ప్రభుత్వం గెలిచిన తర్వాత ఈనెల 9న మూడో శాసనసభ సమావేశాలు జరిగాయి. ఈ సమావేశాలకు శాసనసభలో సీనియర్​ నేత అయిన ఎంఐఎం అధ్యక్షుడు, ఎమ్మెల్యే అక్బరుద్దీన్​ ఒవైసీ ప్రొటెం స్పీకర్(Pro-tem Speaker)​గా వ్యవహరించారు. ముందుగా ఆయన రాజ్​భవన్​లో ప్రొటెం స్పీకర్​గా ప్రమాణస్వీకారం చేసిన అనంతరం శాసనసభలో బాధ్యతలు స్వీకరించారు. అనంతరం 100 మంది ఎమ్మెల్యేలతో ప్రమాణస్వీకారం చేయించారు.

మంత్రులలో ఉత్తమ్​ కుమార్​ రెడ్డి, కోమటిరెడ్డి వెంకట్​ రెడ్డి ఎంపీలుగా రాజీనామా చేయకపోవడం వల్ల ఎమ్మెల్యేలుగా ప్రమాణస్వీకారం చేయలేదు. మొత్తం 119 మంది ఎమ్మెల్యేలలో 101 మంది మాత్రమే ప్రమాణస్వీకారం చేశారు. బీజేపీకి చెందిన 8 మంది ఎమ్మెల్యేలు ఎంఐఎం ఎమ్మెల్యే అక్బరుద్దీన్​ను ప్రొటెం స్పీకర్​గా నియమించడాన్ని వ్యతిరేకిస్తూ గైర్హాజరయ్యారు. మరోవైపు బీఆర్ఎస్​లో కొంతమంది కూడా ప్రమాణ స్వీకారం చేయలేదు. తెలంగాణ శాసనసభ ఎన్నికలు 2023 ఎన్నికల్లో 119 స్థానాల్లో కాంగ్రెస్​ పార్టీ తన మిత్రపక్షం సీపీఐతో కలిసి 65 స్థానాల్లో గెలుపొందగా, బీఆర్​ఎస్​ 39 స్థానాల్లోనూ, బీజేపీ 8 స్థానాలు, ఎంఐఎం పార్టీ 7 స్థానాల్లో విజయం సాధించింది.