Telangana Assembly Elections Polling Arrangements 2023 :రాజకీయ పార్టీలు, అభ్యర్థులు హోరాహోరీగా తలపడుతుండటంతో రాష్ట్రంలో ఎన్నికల వాతావరణం వేడెక్కింది. ఇదే సమయంలో పకడ్బందీగా ఎన్నికలు నిర్వహించేందుకు సీఈసీ ముందస్తుగా సన్నద్ధమైంది. షెడ్యూల్‌ కంటే ముందే హైదరాబాద్‌లో జరిపిన సన్నద్ధత సమీక్షలో అధికారులకు స్పష్టమైన సంకేతాలిచ్చింది. తనిఖీలు, ప్రలోభాల విషయంలో కఠినంగా వ్యవహరించాలని ప్రధాన ఎన్నికల కమిషనర్‌ హెచ్చరించారు. అంతటితో ఆగకుండా సీనియర్ అధికారులు సహా, ఐఏఎస్, ఐపీఎస్లను పెద్ద ఎత్తున బదిలీ చేసింది. ఫిర్యాదులు, ఇతరత్రా అంశాల దృష్ట్యా అధికారులపై బదిలీ వేటు పడుతూనే ఉంది.
Telangana Election Polling Arrangements 2023: గత అనుభవాలు, ఇటీవలె మునుగోడు ఉప ఎన్నిక ఉదంతాలను కేంద్ర ఎన్నికల సంఘం పదేపదే ప్రస్తావిస్తూ వస్తోంది. ఈసీ హెచ్చరికల నేపథ్యంలో అధికారులు దూకుడు పెంచటంతో భారీగా నగదు, బంగారం, కానుకలు పట్టుబడ్డాయి. 2018 ఎన్నికల్లో స్వాధీనాల మొత్తం రూ.137కోట్ల 97లక్షలు కాగా ఇప్పుడు ప్రకటన వెలువడిన నెల రోజుల్లోనే ఆ మొత్తం రూ. 525కోట్లు దాటింది. అటు ఎన్నికల నిర్వహణ, ఇతర అంశాలతో పాటు ప్రలోభాలకు సంబంధించిన ఫిర్యాదులు వస్తూనే ఉన్నాయి. వీటన్నింటి నేపథ్యంలో ఎన్నికల నిర్వహణపైసీఈసీ ప్రత్యేక దృష్టి సారించింది.
MLA Raghunandan Rao Complaint to EC : 'వారిపై చర్యలు తీసుకోకపోతే దిల్లీ వెళ్లి ఈసీని కలుస్తాం'
Telangana Assembly Election 2023: ఎన్నికల కోసం సాధారణ, పోలీసు వ్యయ పరిశీలకులుగా ఇతర రాష్ట్రాల అధికారులను నియమిస్తుంటారు. ఈసారి సైతం ఒక్కొక్కరికి ఒకటి లేదా రెండు నియోజకవర్గాలు అప్పగిస్తూ ఐఏఎస్, ఐపీఎస్, ఐఆర్ఎస్ అధికారులను నియమించారు. వారికి అదనంగా విశ్రాంత అధికారులను ప్రత్యేక పరిశీలకులుగా పంపించారు. సాధారణ పరిశీలకుడిగా ఐఏఎస్ అధికారి అజయ్ వి. నాయక్‌, పోలీసు పరిశీలకుడిగా ఐపీఎస్ దీపక్ మిశ్రా, వ్యయ పరిశీలకుడిగా ఐఆర్ఎస్ అధికారి ఆర్.బాలకృష్ణన్‌కు బాధ్యతలు అప్పగించారు. ప్రత్యేక పరిశీలకులుగా నియమితులైన ముగ్గురు విశ్రాంత అధికారులు ఇప్పటికే రాష్ట్ర అధికారులతో సమావేశమై పరిస్థితులను సమీక్షించారు.