ప్రపంచానికి అన్నం పెట్టే రైతన్నలు రోడ్డెక్కి నిరసన తెలపడం బాధాకరమని వ్యవసాయశాఖ మంత్రి సింగిరెడ్డి నిరంజన్ రెడ్డి అన్నారు. జాతీయ రైతు దినోత్సవం సందర్భంగా మాట్లాడిన ఆయన.... కేంద్రం తీసుకొచ్చిన నూతన వ్యవసాయ చట్టాలకు రైతుల సూచించిన మార్పులు చేయాలని డిమాండ్‌ చేశారు. ఎముకలు కొరికే చలిలోనూ దిల్లీ పరిసరాల్లో పంజాబ్‌, హరియాణా, రాజస్థాన్‌, మహారాష్ట్ర రైతులు ఆందోళనలను చేస్తున్నారన్నారు. రైతుల డిమాండ్లకు అనుగుణంగా మార్పులు చేయడానికి కేంద్ర ప్రభుత్వం ఇప్పటికీ ముందుకు రాకపోవడం విచారకరమని మంత్రి నిరంజన్రెడ్డి పేర్కొన్నారు.
కొత్త సాగు చట్టాలను వెనక్కి తీసుకోవాలని రైతులు చేస్తున్న ఆందోళనల్లో ఇప్పటి వరకు 41 మంది రైతులు ప్రాణాలు కోల్పోయారని ఆవేదన వ్యక్తం చేశారు. వందల మంది రైతులు కేంద్ర ప్రభుత్వ దమనకాండలో గాయపడ్డారని వివరించారు. దేశవ్యాప్తంగా 50 రైతు సంఘాలు, వేల సంఖ్యలో ట్రక్ డ్రైవర్లు ఆందోళనకు మద్దతుగా పోరాడుతున్నారని పేర్కొన్నారు. కోట్ల మంది ప్రజలు రైతులకు మద్దతు తెలుపుతున్నా కేంద్ర ప్రభుత్వంలో చలనం రాకపోవడం దేశానికి మంచిది కాదన్నారు.