సంగీత ప్రపంచంలో మరుగునపడ్డ 50 మంది సంగీత విద్వాంసుల గొప్పతనాన్ని వివరిస్తూ ప్రముఖ సినీ రచయిత, నటుడు తనికెళ్ల భరణి తెలుగులో రచించిన ఎందరో మహానుభావులు పుస్తకం ఆంగ్లంలోకి అనువాదించడం ఎంతో ఆనందంగా ఉందని శాంతా బయోటెక్ వ్యవస్థాపకులు వరప్రసాదరెడ్డి అన్నారు. నేటి తరానికి పది మంది సంగీత విద్వాంసులు కూడా తెలియడం లేదని, అలాంటి వారి విశేషాలతో కూడిన రచన ఆంగ్లంలోకి అనువదించడం ప్రపంచవ్యాప్తంగా మరింత గుర్తింపు సాధిస్తుందన్నారు.
ఎందరో మహానుభావులు రచనను సత్య భావన ఆంగ్లంలోకి అనువదించగా అన్విష్కీక పబ్లిషర్స్ ప్రచురించింది. ఈ పుస్తకాన్ని హైదరాబాద్ ప్రసాద్ ల్యాబ్లో వరప్రసాద్ రెడ్డితోపాటు తనికెళ్ల భరణి, దర్శకేంద్రుడు రాఘవేందర్ రావు, సీబీఐ పూర్వ జేడీ లక్ష్మీనారాయణ ఆవిష్కరించారు. ఈ సందర్భంగా తనికెళ్ల భరణితో ఉన్న అనుబంధాన్ని గుర్తుచేసుకున్న అతిథులు... ఎందరో మహానుభావులు పుస్తకం నేటి తరం యువతకు ఎంతో స్ఫూర్తినిస్తుందని జేడీ లక్ష్మీనారాయణ అభిప్రాయపడ్డారు.
అజ్ఞాతంగా మిగిలిపోయిన మహా స్రష్ఠలు, వాళ్లు సంగీత మునులు, రుషులు వాళ్లను వెలికితీసుకొచ్చి పదిమందికి పరిచయం చేస్తే మంచిదనే అభిప్రాయంతోని తనికెళ్ల భరణి ఈ యజ్ఞాన్ని సంకల్పించి చేశారు. ఆయన సంకల్పం నెరవేరింది.
-- వరప్రసాదరెడ్డి, శాంతా బయోటెక్ వ్యవస్థాపకులు
ఈ పుస్తకంలో 51 మంది జీవిత చరిత్రలు ఒక్కచోట దొరికితే అంతకన్న అదృష్టం ఏముంటుంది యువతరానికి. సత్య భావన చేసిన ఈ తర్జుమా విశ్వవ్యాప్తంగా పరిచయం చేస్తున్న గొప్ప అవకాశం.