రాష్ట్రంలో ప్రజలు జలుబు, దగ్గు, జ్వరం, ఒళ్లు నొప్పులు, తలనొప్పితో తల్లడిల్లుతున్నారు. సీజనల్ వ్యాధులతో మంచాన పడుతున్నారు. హైదరాబాద్తో పాటు, ఆదిలాబాద్, భద్రాద్రి కొత్తగూడెం, రంగారెడ్డి జిల్లాల్లో ఈ ప్రభావం అధికంగా ఉంది. జ్వరాల చికిత్స కోసం ప్రత్యేకంగా నల్లకుంటలో ఏర్పాటుచేసిన ఫీవర్ ఆస్పత్రికి రోగుల తాకిడి పెరుగుతోంది. ఒక్క మంగళవారమే సుమారు 2వేల మందికి పైగా రోగులు ఆస్పత్రికి వచ్చారు. సాధారణంగా మూడు వందల నుంచి ఐదు వందల వరకు ఉండే ఓపీల సంఖ్య గత నెల నుంచి వెయ్యికి చేరుతోంది.
మరోవైపు గాంధీ, ఉస్మానియా, నిమ్స్ ఆస్పత్రులకు వచ్చే రోగుల సంఖ్య పెరుగుతోంది. ఒక్క గాంధీలోనే గత నెలలో 400 మంది ఇన్ పేషంట్లుగా చేరారు. ఇక ఉస్మానియాలోనూ పరిస్థితి అలానే ఉంది. జ్వరాలతో ఆస్పత్రుల్లో చేరుతున్న వారిలో డెంగ్యూ లక్షణాలు అత్యధికంగా కనిపిస్తున్నాయి. గత నెలలో గాంధీ ఆస్పత్రిలో సుమారు 70 మంది డెంగ్యూ చికిత్స తీసుకున్నారు. నల్లకుంట ఫీవర్ ఆస్పత్రిలోనూ ప్రస్తుతం 20 మంది డెంగ్యూతో చికిత్స పొందుతున్నారు. వీరిలో బాలింతలు, ఏడేళ్లలోపు చిన్నారులు, వృద్ధులే అధికంగా ఉన్నారు. వ్యక్తిగత పరిశుభ్రత పాటిస్తే విషజ్వరాల పంజా నుంచి తప్పించుకోవచ్చని వైద్యులు సూచిస్తున్నారు.