వెయ్యికి చేరువలో కరోనా కేసులు.. అప్రమత్తంగా ఉండాలని సర్కారు సూచన

రాష్ట్రంలో కరోనా వ్యాప్తి మళ్లీ తీవ్రమవుతోంది. రోజురోజుకూ వైరస్‌ బారిన పడుతున్నవారు పెరుగుతున్నారు. రోజువారీ పాజిటివ్‌ కేసుల సంఖ్య వెయ్యికి చేరువవుతోంది. ప్రజలు మరింత అప్రమత్తంగా ఉండాల్సిన అవసరముందని ప్రభుత్వం సూచిస్తోంది.

రాష్ట్రంలో కొవిడ్‌ మళ్లీ ఉద్ధృతంగా వ్యాపిస్తోంది. కొత్తగా 59వేల 343 మందికి పరీక్షలు నిర్వహించగా... 965 మందికి పాజిటివ్‌గా నిర్ధరించారు. మరో ఐదుగురు మహమ్మారికి బలికాగా... మొత్తంగా కరోనా మరణాల సంఖ్య 1,706కు చేరింది. 312 మంది వైరస్‌ నుంచి కోలుకోగా... ప్రస్తుతం 6,159 క్రియాశీల కేసులున్నట్లు వైద్యారోగ్యశాఖ ప్రకటించింది.

కొత్త కేసుల్లో దాదాపు సగం జీహెచ్ఎంసీ దాని చుట్టుపక్కల జిల్లాల్లోనే వెలుగుచూశాయి. బల్దియా పరిధిలో 254 మంది, మేడ్చల్‌ మల్కాజ్‌గిరి జిల్లాలో 110, రంగారెడ్డి జిల్లాలో 97 మందికి వైరస్‌ సోకింది. ఆ తర్వాత నిజామాబాద్‌ జిల్లాలో అత్యధికంగా 64 మందికి పాజిటివ్‌గా నిర్ధరించారు. జగిత్యాల జిల్లాలో 35, సంగారెడ్డి, కరీంనగర్‌ జిల్లాలో 29 చొప్పున వైరస్‌ బారిన పడ్డారు.

97 శాతం కోలుకుంటున్నారు...

రాష్ట్రంలో నూటికి 97మంది కోలుకుంటున్నారన్న వైద్యారోగ్య శాఖ ఆందోళన అవసరం లేదని పేర్కొంది. ఇప్పటివరకు 3 లక్షల 9వేల 741 మందికి వైరస్‌ సోకగా... అందులో 3 లక్షల ఒక వెయ్యి 876 మంది కోలుకున్నట్లు తెలిపింది. అయితే రెండో దశవ్యాప్తిలో 90 శాతం కేసులు లక్షణాలు లేనివే ఉంటున్నందున అజాగ్రత్త వద్దని సూచిస్తోంది.

యువతలో ఎక్కువ మందికి పాజిటివ్‌ వస్తున్న వేళ వారు ఉదాసీనంగా ఉండొద్దని వారిస్తోంది. మాస్క్‌ ధారణ, భౌతికదూరం, పరిశుభ్రత పట్ల నిత్యం అవగాహన కల్పిస్తోంది. వ్యాక్సిన్‌ ప్రక్రియ మరింత వేగవంతం చేశామని... 45 ఏళ్లు దాటిన ప్రతి ఒక్కరూ టీకా తీసుకోవాలని వైద్యారోగ్యశాఖ సూచిస్తోంది.

ఇదీ చూడండి: పనిచేసే ప్రభుత్వాన్ని కాపాడుకోవాల్సిన బాధ్యత ప్రజలదే: కేటీఆర్​