Sri Rama Navami Celebrations in Telangana: భద్రాద్రి రాములోరి కల్యాణ వేడుక వైభవంగా జరిగింది. అభిజిత్‌ లగ్నంలో రామయ్య, జగన్మాత సీతమ్మ మెడలో... మాంగళ్యధారణ చేశారు. రాష్ట్ర ప్రభుత్వం తరఫున మంత్రి ఇంద్రకరణ్‌ రెడ్డి, పువ్వాడ అజయ్‌ కుమార్‌... స్వామివారికి పట్టువస్త్రాలు, ముత్యాల తలంబ్రాలు సమర్పించారు. రెండేళ్ల తర్వాత దేవదేవుడి కల్యాణ వైభోగాన్ని కనులారా వీక్షించి భక్తజనం పులకించింది.
వైభవంగా రాములోరి కల్యాణం: హరిహర క్షేత్రంగా విరాజిల్లుతున్న వేములవాడలో శ్రీ సీతారాముల కల్యాణం వైభవంగా జరిగింది. కన్నుల పండువగా సాగిన స్వామివారి కల్యాణ పర్వాన్ని చూసేందుకు పెద్దసంఖ్యలో భక్తులు తరలివచ్చారు. శ్రీసీతారామ చంద్రమూర్తి స్వామివార్లకు పంచోపనిషత్తు ద్వారా అభిషేకాలు, మూలవిరాట్‌కు కల్యాణం నిర్వహించారు. కొండగట్టులోనూ రాములోరి కల్యాణం వైభవంగా సాగింది. హైదరాబాద్‌లో రెండేళ్ల తర్వాత శ్రీరామనవమి శోభాయాత్రలు ఘనంగా జరిగాయి. పోలీసులు పకడ్బందీగా భద్రతా ఏర్పాట్లు చేశారు.
కర్మాన్‌ఘాట్‌లో రేవంత్‌, అమీర్పేటలో తలసాని: కర్మాన్‌ఘాట్‌ ఆంజనేయ స్వామి ఆలయంలో రేవంత్‌రెడ్డి పూజలు చేశారు. భాగ్యనగర ఉత్సవ కమిటీ ఆధ్వర్యంలో సీతారాంబాగ్‌ నుంచి హనుమాన్ వ్యాయామశాఖ వరకు శోభాయాత్ర కనులపండువగా సాగింది. దూల్‌పేటలో లక్ష్మణ సమేత సీతారాములను దర్శించుకునేందుకు భక్తజనం పోటెత్తారు. మహానగరమంతటా.... జై శ్రీరామ్ నినాదాలు హోరెత్తాయి. అమీర్‌పేట గురుగోబింద్‌ మైదానంలో మంత్రి తలసాని రామనవమి ఉత్సవాల్లో పాల్గొన్నారు.
పలు జిల్లాల్లో వైభవంగా:ఉమ్మడి నిజామాబాద్ జిల్లా వ్యాప్తంగా శ్రీ రామనవమి వేడుకలు అంగరంగ వైభవంగా నిర్వహించారు. ఖిల్లా రామాలయంతో పాటు దోమకొండ, భిక్కనూర్, కామారెడ్డి, బీర్కూర్ మండలాల్లో అన్ని రామాలయాలు భక్తులతో కిటకిటలాడాయి. నల్గొండలో సీతారాముల కల్యాణమహోత్సవాన్ని జనం భక్తిశ్రద్ధలతో తిలకించారు. ఎంపీ కోమటిరెడ్డి వెంకటరెడ్డి సహా అనేకమంది వేడుకల్లో పాల్గొన్నారు. హనుమకొండలో వైభవంగా కల్యాణ క్రతువు జరిపించారు. కొత్తగూడెం జిల్లా సత్యనారాయణపురంలో దర్గాలో రామనవమి వేడుకలు ప్రత్యేక ఆకర్షణగా నిలిచాయి. మేడ్చల్ జిల్లా కీసర మండలం నాగారం నేతాజీ నగర్ బాపూరెడ్డి నగర్‌లో ఘనంగా సీతారాముల కల్యాణం అంగరంగ వైభవంగా జరిగింది. కరీంనగర్‌ జిల్లా ఇల్లందకుంటలో సీతారాముల కల్యాణ మహోత్సవానికి మంత్రి గంగుల కమలాకర్, ఎమ్మెల్యే ఈటల రాజేందర్‌ తదితరులు వీక్షించారు.