Sri Ram Navami Shobhayatra in Hyderabad: హైదరాబాద్లో శ్రీరాముడి శోభాయాత్రకు అన్ని ఏర్పాట్లు పూర్తి చేశామని భాగ్యనగర్ శ్రీరామనవమి ఉత్సవ సమితి అధ్యక్షుడు భగవత్రావు తెలిపారు. ఉత్సవ సమితి ఆధ్వర్యంలో.. 2010 నుంచి హైదరాబాద్లో శ్రీరాముడి శోభాయాత్ర నిర్వహిస్తున్నామని ఆయన పేర్కొన్నారు. 200 సంవత్సరాల చరిత్ర గల సీతారాంబాగ్లోని రామాలయం నుంచి కోఠిలోని హనుమాన్ వ్యాయామశాల వరకు శోభాయాత్ర జరుగుతుందన్నారు.
ఈ శోభాయాత్ర సీతారాంబాగ్ నుంచి బోయగూడ కమాన్ - మంగళహాట్ పీఎస్ - పురానా పూల్ - బేగంబజార్ - సిద్ధంబర్ బజార్ - గౌలిగూడ - గురుద్వారా - రాంమందిర్ - తిలక్ పార్క్ - పుత్లిబౌలి - కోఠి ఆంధ్రాబ్యాంక్ - బడి చౌడి మీదుగా హనుమాన్ వ్యాయామశాలకు చేరుతుందన్నారు. అంబర్పేట్ నుంచి, ఫిలింనగర్ నుంచి మరి కొన్ని శోభాయాత్రలు కోఠి వ్యాయామశాలకు వస్తాయన్నారు.
ఆకాశ్ పురి నుంచి మరో శోభాయాత్ర దూల్పేట్ కూడలి వద్ద కలుస్తుందని తెలిపారు. శాంతియుతంగా ఈ శోభాయాత్ర నిర్వహిస్తామని.. శోభాయాత్రకు వచ్చే భక్తులకు దారి పొడవున అన్న పానీయాలు అందుబాటులో ఉంటాయని భగవత్రావు స్పష్టం చేశారు. శ్రీరామనవమి శోభాయాత్రకు రాజకీయాలకు అతీతంగా ప్రతి ఒక్కరు తరలిరావాలని ఆహ్వానిస్తున్నామన్నారు. యాత్రలో భాగంగా శ్రీరాముని వేషధారణతో పాటు స్వతంత్ర సమరయోధుల వేషధారణలో పలువురు కనిపించనున్నారు.