ఆ పల్లె రోజురోజుకూ కరిగిపోతోంది... నదిలో కొట్టుకుపోతోంది!

ఏపీలో కృష్ణానది పరివాహకంగా ఉన్న ఆ గ్రామం.. క్రమంగా నీట మునుగుతోంది. వరద నీటి ఉద్ధృతి ఎక్కువైనప్పుడు భూమి కోతకు గురవుతూ.. నది ముందుకు వస్తోంది. దీంతో సమీపంలోని ఇళ్లు కొట్టుకుపోతున్నాయి. క్రమంగా ఇళ్లు అదృశ్యమవుతూ.. గ్రామమే కనుమరుగయ్యే ప్రమాదం పొంచి ఉందని స్థానికులు వాపోతున్నారు.

ఆంధ్రప్రదేశ్​లోని కృష్ణాజిల్లా అవనిగడ్డ మండలం పాత ఎడ్లలంక గ్రామం చుట్టూ కృష్ణానది ప్రవహిస్తోంది. ఈ ప్రాంతంలో 400 కుటుంబాలు నివసిస్తుండగా.. 2 వేల ఎకరాలు సాగుభుమి ఉంది. కృష్ణానదికి వచ్చే ఆటుపోట్ల కారణంగా నది తీరం కోతకు గురవుతోంది. వరదలు రావడం.. నీటి వేగం ఎక్కువై.. ఇళ్లు సైతం కుప్పకూలి నీట మునుగుతున్నాయి. దీంతో నది ఒడ్డున నివాసం ఉండేవారు ఏ సమయంలో తమ ఇల్లు నదిలో కలసిపోతుందోనని భయంతో బిక్కుబిక్కుమని కాలం వెళ్లదీస్తున్నారు. క్రాస్ బండ్, రివిట్​మెంట్ కట్టిస్తామని అధికారులు, ప్రజా ప్రతినిధులు 30 ఏళ్లుగా కాలయాపన చేస్తున్నారు.

రాకపోకలకు అంతరాయం..

మరోవైపు గ్రామానికి వెళ్లటానికి కృష్ణానది పాయపై సుమారు 500 మీటర్ల దూరం వంతెన నిర్మాణం చేయకపోవడంతో రాకపోకలకు ఇబ్బందులు ఎదురవుతున్నాయి. తాత్కాలికంగా ఇసుకతో నిర్మించిన కాజ్​వే.. వరద నీరు వస్తే కొట్టుకుపోతుంది. ఈ సమయంలో నీటిలోకి దిగి ప్రయాణించాల్సి వస్తోందని స్థానికులు వాపోతున్నారు. కృష్ణానదికి వరదలు వచ్చినప్పుడు అవనిగడ్డలో పునరావాస కేంద్రాలకు తరలిస్తున్నారని.. ఈ క్రమంలో పశుపక్ష్యాదులను ఊరిలో వదిలేసి.. రావాల్సి వస్తోందని గ్రామస్థులు ఆవేదన వ్యక్తం చేశారు. అప్పటి వరకు ఆ ముగజీవాలు.. నీరు, ఆహారం లేకపోవడంతో మృతి చెందుతున్నాయని వాపోయారు.

పట్టించుకోని అధికారులు..

మరోవైపు అక్రమంగా ఇసుక రవాణా చేస్తున్నారని.. దీంతో తీరం మరింత కోతకు గురవుతుందని గ్రామస్థులు ఆందోళన చెందుతున్నారు. వీటిపై అధికారులకు ఫిర్యాదు చేసినా పట్టించుకోవటం లేదని ఆవేదన చెందారు. కాజ్​వే స్థానంలో వంతెన నిర్మాణం చేపట్టాలని ఎడ్లలంక గ్రామస్థులు కోరుతున్నారు. అలాగే నది ఆటుపోట్లుకు భూమి కోతకు గురవ్వకుండా.. క్రాస్ బండ్​ నిర్మించాలని విన్నవించారు. అధికారులు వెంటనే స్పందించి సమస్యలను పరిష్కరించాలని కోరారు.

ఇదీ చదవండీ..YS Viveka Murder Case : వైఎస్​ వివేకా హత్య కేసు.. దూకుడు పెంచిన సీబీఐ