గ్రేటర్ హైదరాబాద్ మహానగరంలో పంచతత్వ పార్కు ప్రజలకు అందుబాటులోకి రానుంది. నగరంలోని ఇందిరా పార్కులోని ఎకరం స్తలంలో ఈ పార్కును తీర్చిదిద్దారు. అన్ని సాధారణ పార్కుల్లా కాకుండా.. నూతన విధానంలో పార్కును అభివృద్ధి చేశారు.
ఆహ్లాదంతో పాటు ఆరోగ్యం
వృత్తాకారంలో ఉండే పంచతత్వ పార్క్ వాక్వేలో 9 బ్లాక్లను ఏర్పాటు చేశారు. ఓ బ్లాక్లో 20 ఎంఎం, మరో బ్లాక్లో 10 ఎంఎం పరిమాణంతో కంకర రాళ్లు, ఇలా ఒక్కో బ్లాక్ళో నల్లరేగడి మట్టి, నీరు, ఇసుక రేణువులు, చెక్కపొట్టు, గులకరాళ్లను ఏర్పాటు చేశారు. పాత్వేలో చెప్పులు, షూస్ లేకుండా నడవడం వల్ల అరికాళ్లలో కలిగే ఒత్తిడి మెదడుకు చేరి మానసిక, ఆరోగ్య ప్రయోజనానికి ఉపకరిస్తుంది.
పంచావతారాలైన భూమి, నీరు, గాలి, ఆకాశం, అగ్నిల సమాహారమే అక్యుప్రేషర్ థీమ్(పంచతత్వ పార్కు). పార్కులో ఓ చెట్టు చుట్టూ.. గడ్డి, ఇసుక, కంకర, చెక్కపొట్టు, నీరు, బురదలతో ప్రత్యేక ట్రాక్ నిర్మించారు. చెప్పులు లేకుండా ఈ ట్రాక్లో నడవడం వల్ల శరీరంలోని అన్ని భాగాలకు రక్త ప్రసరణ మెరగవుతుందని చెబుతున్నారు.
మానసిక ఉల్లాసం
సాధారణంగా వాకింగ్ చేసే వారితో పోలిస్తే.. కొబుల్స్టోన్స్పై నడిచే వృద్ధుల్లో బీబీ సంబంధిత సమస్యలు తక్కువగా ఉన్నట్లు గుర్తించారు. పాదాలకు ఆచ్ఛాదన లేకుండా నడవడం వల్ల శరీరంలోని అన్ని భాగాలూ బాగా పనిచేస్తాయని అంటున్నారు. ఈ వ్యాయామంతో శారీరకంగానే కాకుండా.. మానసిక దృఢత్వమూ.. పెరుగుతుందని చెబుతున్నారు. ఉదయం 5 నుంచి 10 వరకు, సాయంత్రం 5 నుంచి 7 గంటల వరకు పంచతత్వ పార్కులో వాకింగ్ చేసే అవకాశం ఉంది.
మంత్రి కేటీఆర్ ఆదేశాల మేరకు
ఎకరం విస్తీర్ణంలో చేపట్టిన వాకింగ్ ట్రాక్ 17 లక్షల రూపాయలతో పనులు చేపట్టారు. పార్కులు భిన్నంగా ఉండాలని మంత్రి కేటీఆర్ ఆదేశాల నేపథ్యంలో ఒక్కో జోన్లో ఒక ఆక్యుప్రేషర్ థీమ్ పార్కును జీహెచ్ఎంసీ అభివృద్ధి చేస్తోంది. ఇందులో నడిస్తే పాదాల్లో ఉండే నాడులు ఉత్తేజం పొంది రక్త ప్రసరణ జరిగి ఎక్కువ దూరం నడిచిన లాభం కలగనుంది. ఇక్కడ నవగ్రహాల మొక్కలు కూడా ఏర్పాటు చేశారు. ఇంపుగా ఉండేందుకుగా నీటి శబ్ధంతో పాటు... గౌతమ బుద్దుడి విగ్రహం ఏర్పాటు చేశారు. ఇక్కడ రాశులకు సంబంధించిన మొక్కలతో పాటు... 45 ఔషధ మొక్కలు కూడా నాటారు.
ఇదీ చదవండి:భూ ఆక్రమణలకు చైనా క్యాబేజీ వ్యూహం..!
