కబ్జాదారుల కోరల్లో పెద్ద చెరువు.. మోక్షం ఎప్పటికో!

హైదరాబాద్​లో చెరువుల పరిస్థితి రోజురోజుకూ దయనీయంగా మారుతోంది. నగరంలో భూముల రేట్లు అంతకంతకూ పెరుగుతుండటం వల్ల కబ్జాదారుల కళ్లు చెరువులపై పడ్డాయి. కాదేదీ కబ్జాలకు అనర్హం అన్నట్లుగా అందినకాడికి కబ్జా చేస్తూ.. కాలనీలు నిర్మిస్తున్నారు. చెరువుల ఆనవాళ్లు లేకుండా చేస్తున్నారు. ఈ క్రమంలోనే నగరంలోని మహేశ్వరం పరిధిలోని మీర్‌పేట్‌ పెద్ద చెరువు.. దాని అనుబంధ చెరువుల ప్రస్తుత పరిస్థితిపై ఈటీవీ ప్రత్యేక కథనం.

హైదరాబాద్ నగరంలో చెరువులు రోజురోజుకూ కనుమరుగవుతున్నాయి. కబ్జాదారుల కోరల్లో చిక్కుకుని తమ ఉనికిని కోల్పోతున్నాయి. జంట నగరాల్లోని చెరువులు చాలా వరకు కబ్జాకు గురి కావడంతో వర్షాలు పడిన ప్రతి సారి పలు కాలనీలు నీట మునుగుతున్నాయి.

హైదరాబాద్ మీర్‌పేట్‌ నగర శివారులోని మీర్‌పేట్‌-బడంగ్‌పేట్‌ల మధ్య మీర్​పేట్ పెద్ద చెరువు ఉంది. హరితహారంలో భాగంగా చెరువు కట్టకు భారీగా డ్రిల్లింగ్‌ చేశారు. మొక్కల కోసం తవ్విన ఈ గుంతల నుంచి నీరు లీక్​ అవుతోంది. శిఖం భూములు చాలా వరకు కబ్జా కావడం.. ఇంటి వ్యర్థాలను కట్టకు లోపలి వైపు పారవేయడంతో చెరువు విస్త్రీర్ణం చాలా వరకు తగ్గిపోయింది. చిన్న పాటి వర్షానికే చెరువు పొంగిపొర్లుతోంది. ఫలితంగా కట్ట కింద ఉన్న కాలనీలు జలదిగ్బంధంలో చిక్కుకుని కొట్టుమిట్టాడుతున్నాయి.

కాలనీల మీదుగానే..

మీర్​పేట్ పెద్ద చెరువు నిండితే.. ఆ నీరు మంత్రాల చెరువులోకి వెళ్తుంది. అయితే నీరు వెళ్లేందుకు ఎలాంటి కాలువలు లేకపోవడం వల్ల టీఎస్ఆర్ నగర్, ఎమ్మెల్లార్ కాలనీ, అయోధ్య నగర్, ఎస్.ఎల్.ఎస్.ఎన్.ఎస్. కాలనీ, తిరుమల ఎంక్లేవ్​, జనప్రియ మహానగర్ కాలనీల మీదుగా మంత్రాల చెరువుకు చేరుకుంటోంది. మంత్రాల చెరువు నుంచి నీరు తాళ్ల చెరువుకు వెళ్లాల్సి ఉంది. అయితే తాళ్ల చెరువు మొత్తం కబ్జాకు గురికావడంతో అటు వెళ్లాల్సిన నీరు సైతం మిథిలా నగర్ కాలనీ, సత్యసాయి నగర్, సాయి బాలాజీ నగర్​ల మీదుగా సందె చెరువులోకి వెళుతోంది.

బిక్కుబిక్కుమంటూ రోజులు వెళ్లదీస్తున్నారు..

ఇటీవల కురిసిన వర్షంతో పెద్ద చెరువులోకి నీరు భారీగా చేరడం వల్ల ఈ కాలనీలన్నీ జలదిగ్బంధంలో చిక్కుకున్నాయి. మొత్తం 5 వేల కుటుంబాల వరదల్లో చిక్కుకోగా.. అందులో సుమారు 3 వేల ఇళ్లు పూర్తిగా నీట మునిగాయి. మిగిలిన 2 వేల ఇళ్లలోకి పాక్షికంగా నీరు చేరడం వల్ల అదే ఇళ్లలో ఉంటూ రోజులు వెళ్లదీస్తున్నారు.

ఇప్పటికీ నీటిలోనే..

భారీ వర్షాల నేపథ్యంలో లోతట్టు ప్రాంతాల ప్రజలను అధికారులు సురక్షిత ప్రాంతాలకు తరలించారు. వర్షాలు తగ్గి దాదాపు 10 రోజులవుతున్నా.. ఇంకా పలు కాలనీలు వరద నీటిలోనే ఉన్నాయి. రియల్‌ ఎస్టేట్​ వ్యాపారుల మాటలు నమ్మి రూ.లక్షలు వెచ్చించి ఇళ్లను కొనుగోలు చేసి.. ప్రస్తుతం తాము భారీ మూల్యాన్ని చెల్లించుకోవాల్సి వస్తోందని బాధితులు ఆవేదన వ్యక్తం చేస్తున్నారు. తమ ఇళ్లు ముంపునకు గురైనా.. ప్రభుత్వం పరిహారం ఇవ్వడం లేదంటూ వాపోతున్నారు.

మీర్​పేట్ పెద్ద చెరువు విస్తీర్ణం 70 ఎకరాలు. ఇందులో సుమారు 20 ఎకరాలు కబ్జాకు గురైంది. ఇక చెరువులో శిఖం భూములు ఎఫ్​టీఎల్ పరిధిలో 35 ఎకరాలు ఉంది. అక్కడా పలువురు ఇళ్లు నిర్మించుకున్నారు. పెద్ద చెరువు కింద ఉన్న మంత్రాల చెరువు విస్తీర్ణం 40 ఎకరాలు. ఇందులో సుమారు 10 ఎకరాలు కబ్జాకు గురైంది. మంత్రాల చెరువులోని ఎఫ్​టీఎల్ పరిధిలో 15 ఎకరాల్లో ఇళ్లు నిర్మాణం చేసుకున్నారు. మంత్రాల చెరువు పక్కనున్న తాళ్ల చెరువు విస్తీర్ణం 33 ఎకరాలు. ప్రస్తుతం ఇక్కడ ఒక్క గుంట భూమి కూడా లేదు. చెరువు స్థలం 33 ఎకరాలు మొత్తం కబ్జాకు గురైంది.

చర్యలు తీసుకోవాలి..

ఇప్పటికైనా ప్రభుత్వం స్పందించి చెరువులను కబ్జా చేస్తున్న వారిపై కఠినంగా వ్యవహరించాలని ప్రజలు కోరుతున్నారు. ఈ క్రమంలోనే అల్మాస్​గూడలో ఎర్రకుంట చెరువు, కోమటి కుంట, పోచమ్మ కుంటలను కాపాడితే.. రాబోయే రోజుల్లో ముప్పు తప్పే అవకాశం ఉందని అభిప్రాయం వ్యక్తం చేస్తున్నారు.

ఇదీ చూడండి..మున్నేరు నది ఒడ్డున సద్దుల బతుకమ్మ వేడుకలు