2020 నాటికి సున్నా స్థాయికి భూగర్భజలాలు
రాష్ట్ర రాజధానిలో భూగర్భ జలాలు ప్రమాద ఘంటికలు మోగిస్తున్నాయి. రానున్న నీటి ఎద్దడిని సూచిస్తున్నాయి. ఇందుకు ఉదాహరణే ఇటీవల నీతి ఆయోగ్ విడుదల చేసిన నివేదిక. దేశంలోని 21 ప్రధాన నగరాల్లో... 2020 నాటికి భూగర్భజలాలు సున్నా స్థాయికి చేరుకుంటాయని నీతి ఆయోగ్ నివేదికలో స్పష్టం చేసింది. అందులో హైదరాబాద్ ఉండటం శోచనీయం. ఇందుకు సజీవ సాక్ష్యాలుగా నిలుస్తున్నాయి నగరంలోని కీలక ప్రాంతాలు. హైటెక్ సిటీ, కొండాపూర్, మాదాపూర్, గచ్చిబౌలి, హఫీజ్ పేట్, నానక్ రాంగూడ లాంటి చోట్ల నిర్మాణాలు కనివినీ ఎరుగని రీతిలో పెరగడం వల్ల భూగర్భ జలాలు అట్టడుగుస్థాయికి పడిపోయాయి. జంట జలాశయాలకు అతి సమీపంలో ఉన్న ఈ ప్రాంతాల్లో ఒకప్పుడు 100 అడుగులు తవ్వితే నీళ్లు వచ్చేవి. ఇప్పుడు అదే చోట 1500 నుంచి 2000 అడుగుల లోతుకు వెళ్లినా నీటిజాడ లేదు.