South Central Railway announced cancellation of 22 Trains : హైదరాబాద్, సికింద్రాబాద్ డివిజన్ల పరిధిలో ట్రాక్ మరమ్మతు పనుల కారణంగా పలు రైళ్లను తాత్కాలికంగా రద్దు చేస్తున్నట్లు దక్షిణ మధ్య రైల్వే శాఖ ప్రకటనను విడుదల చేసింది. జులై 3 నుంచి జులై 9వ తేదీ వరకు 24 రైళ్లను.. అదేవిధంగా గ్రేటర్ హైదరాబాద్లో నడిచే 22 ఎంఎంటీఎస్ రైళ్లను రద్దు చేసినట్లు దక్షిణ మధ్య రైల్వే అధికారులు వెల్లడించారు. ఈ రైల్వే పరిధిలోని ట్రాక్ మరమ్మతు పనులను ముమ్మరంగా చేస్తుండటంతో.. ఆకస్మికంగా పలు రైళ్లను రద్దు చేస్తున్నారు.
ఈ నెల 3వ తేదీ నుంచి 9వ తేదీ వరకు హైదరాబాద్, సికింద్రాబాద్ డివిజన్ల పరిధిలో ట్రాక్ మరమ్మతుల పనులు చేపడుతున్నారు. దీనితో రైళ్ల రాకపోకలకు అంతరాయం కలుగుతుందనే కారణంతో పలు రైళ్లను రద్దు చేసినట్లు ఈ సందర్భంగా రైల్వే శాఖ ప్రకటించింది. సాధారణ రైళ్లతో పాటు ఈ తేదీల్లో గ్రేటర్ హైదరాబాద్లో వివిధ రూట్లలో నడుస్తున్న 22 ఎంఎంటీఎస్ రైళ్లనూ రద్దు చేశారు.
22 MMTS Trains Cancelled On July 03 To July 09 : లింగంపల్లి, ఫలక్నుమా, ఉందానగర్, రామచంద్రాపురం మధ్య నడిచే 22 ఎంఎంటీఎస్ సర్వీసులను రద్దు చేస్తున్నట్లు దక్షిణ మధ్య రైల్వే అధికారులు అధికారికంగా వివరాలను వెల్లడించారు. కావున నగరంలోని ప్రయాణికులు, దూర ప్రాంతాలకు వెళ్లే ప్రయాణికులు సహకరించాలని విజ్ఞప్తి చేశారు. అలాగే 24 సాధారణ రైళ్లను కూడా రద్దు చేశారు.