రాష్ట్రవ్యాప్తంగా సోనియమ్మ జన్మదిన వేడుకలు - గాంధీభవన్​లో భారీ కేక్ కట్ చేసిన సీఎం రేవంత్

Sonia Gandhi Birthday Celebrations at Gandhi Bhavan : గాంధీభవన్​లో కాంగ్రెస్ అగ్రనేతలంతా, సోనియాగాంధీ 78వ జన్మదిన వేడుకలు ఘనంగా నిర్వహించారు. ఈ వేడుకలకు ముఖ్య అతిథిగా సీఎం రేవంత్ రెడ్డి, ఉపముఖ్యమంత్రి భట్టి విక్రమార్క, పార్టీ వ్యవహారాల ఇన్​ఛార్జ్ మాణిక్యరావు ఠాక్రే, పలువురు మంత్రులు హాజరయ్యారు. 78 కిలోల కేకును మాజీ పీసీసీ అధ్యక్షుడు వి.హనుమంతురావుతో రేవంత్ రెడ్డి కట్ చేయించారు. అనంతరం తెలంగాణ ఇచ్చిన సోనియాగాంధీకి, ప్రభుత్వ ఏర్పాటును కానుకగా ఇచ్చిన ప్రజలకు రేవంత్ రెడ్డి కృతజ్ఞతలు తెలిపారు. కాంగ్రెస్ ప్రభుత్వం రాష్ట్ర ప్రజలకు అంకితమని పేర్కొన్నారు.

Sonia Gandhi Birthday Celebrations at Gandhi Bhavan :రాష్ట్ర వ్యాప్తంగా కాంగ్రెస్‌ అగ్రనేత సోనియాగాంధీ జన్మదిన వేడుకలను కాంగ్రెస్‌ పార్టీ నాయకులు, కార్యకర్తలు, అభిమానులు ఘనంగా నిర్వహించారు. తెలంగాణ స్వరాష్ట్ర ఆకాంక్షను నెరవేర్చిన ప్రదాత సోనియాగాంధీ అంటూ, జై కాంగ్రెస్ జై సోనియమ్మ అని నినాదాలు చేశారు. సికింద్రాబాద్ కాంగ్రెస్ నేత(Congress Leader) ఆడం సంతోష్ కుమార్ ఆధ్వర్యంలో తుకారం గేట్​లో సోనియాగాంధీ 78వ జన్మదిన వేడుకలను ఘనంగా నిర్వహించారు.

సోనియా గాంధీ చిత్రపటానికి పాలాభిషేకం చేసి కేక్ కట్ చేసి సంబరాలు జరుపుకున్నారు. హైదరాబాద్ రాంనగర్ చౌరస్తాలో ఎఐసీసీ మత్స్య విభాగం జాతీయ కార్యదర్శి బిజ్జి శత్రు తదితరులు కేక్ కట్ చేసి సంబరాలు చేశారు.బస్సులో ప్రయాణిస్తున్న మహిళలకు ఆయన మిఠాయిలు పంచి శుభాకాంక్షలు తెలిపారు.

శేరిలింగంపల్లి నియోజకవర్గ ఇన్చార్జ్ జగదీశ్వర్ గౌడ్, వివేకానంద నగర్ డివిజన్ రిక్షా పుల్లర్ కాలనీలో సోనియమ్మ జన్మదిన వేడుకల్లో ఆయన ముఖ్యఅతిథిగా పాల్గొని కేక్ కట్ చేశారు. ఉస్మానియా యూనివర్సిటీలో(Osmania University) సోనియాగాంధీ జన్మదిన వేడుకలు ఘనంగా నిర్వహించారు. యూనివర్సిటీలోని మహిళా ఉద్యోగులకు చీరలు పంపిణీ చేశారు.

తెలంగాణ రాష్ట్రం ఏర్పాటులో కేంద్ర ప్రభుత్వం నుంచి నాటి హోం శాఖ మంత్రి చిదంబరం రాష్ట్ర ఏర్పాటు ప్రక్రియను మొదలుపెట్టారు. ఒకటి కేంద్ర ప్రభుత్వం తెలంగాణ పట్ల పరిపాలక నిర్ణయం తీసుకోవడం, రెండు ఇచ్చిన మాటను నిలబెట్టుకోవటానికి ఎన్ని ఒడుదొడుకులు ఎదురైనా, ఎన్ని రాజకీయ ప్రకంపనలు ఎదుర్కోవాల్సి వచ్చినా అన్నిటినీ తట్టుకొని నిలబడి ఉక్కు సంకల్పంతోటి అరవై సంవత్సరాల ఆకాంక్షను కాంగ్రెస్ పార్టీ అధినేత్రి సోనియాగాంధీ నెరవేర్చారు.-రేవంత్‌ రెడ్డి, రాష్ట్ర ముఖ్యమంత్రి

కరీంనగర్‌లోని 41వ డివిజన్‌లో కాంగ్రెస్ పార్టీ నాయకులు, కార్యకర్తలు కేక్ కోసి సోనియాగాంధీ జన్మదిన వేడుకలను ఘనంగా నిర్వహించారు. జయశంకర్ భూపాలపల్లి జిల్లాలో ఐఎన్​టీయూసీ కార్మిక సంఘం నాయకులు కేటీకే 1వ గని, 5వ, 6వ సింగరేణి గనుల వద్ద కేక్ కట్ చేసి, మిఠాయిలు పంపిణీ చేశారు. సిద్దిపేట పట్టణంలోని ముస్తాబాద్ చౌరస్తాలో కాంగ్రెస్ నాయకులు కేక్ కట్ చేశారు. హనుమకొండ జిల్లా పరకాల రెవెన్యూ డివిజన్ వ్యాప్తంగా బాణసంచా పేల్చి సంబరాలు చేసుకున్నారు.

Sonia Gandhi Birthday Celebrations in Telangana :జగిత్యాల జిల్లాలోని ఇందిరా భవన్‌లో ఎమ్మెల్సీ టి. జీవన్ రెడ్డి(MLC Jeevan Reddy) ఆధ్వర్యంలో సోనియాగాంధీ జన్మదిన వేడుకలను ఘనంగా నిర్వహించారు. ఈ కార్యక్రమంలో నాయకులు, కార్యకర్తలు పెద్ద సంఖ్యలో పాల్గొన్నారు. మహబూబాబాద్ జిల్లా కేంద్రంలోని కాంగ్రెస్ పార్టీ కార్యాలయంలో కాంగ్రెస్ పార్టీ అధినేత్రి సోనియాగాంధీ పుట్టిన రోజు వేడుకలను ఘనంగా నిర్వహించారు.సోనియమ్మ పుట్టిన రోజు పురస్కరించుకొని నిర్మల్ జిల్లా కాంగ్రెస్ పార్టీ అధ్యక్షులు కూచాడి శ్రీహరి రావు ప్రభుత్వ ఆసుపత్రులలో పండ్లు, బ్రెడ్లు పంపిణీ చేశారు.

రాష్ట్ర వ్యాప్తంగా కాంగ్రెస్‌ అగ్రనేత సోనియాగాంధీ జన్మదిన వేడుకలు అంబరాన్నంటాయి. కాంగ్రెస్‌ శ్రేణులు పెద్ద ఎత్తున సంబరాలు నిర్వహించారు. సోనియమ్మ తెలంగాణ ప్రజల 60 ఏళ్ల ఆకాంక్షను నెరవేర్చిందని కొనియాడారు. తన నాయకత్వంలో తెలంగాణ అభివృద్ది పథంలో దూసుకుపోంతుందని కాంగ్రెస్‌ శ్రేణులు ఆశాభావం వ్యక్తం చేశారు.