ఆంధ్రప్రదేశ్‌లోని 4 జిల్లాల్లో జరిగిన సిరో సర్వైలెన్స్ ఫలితాలపై విశ్లేషణ జరుగుతోంది. ఎంపిక చేసిన వ్యక్తుల్లో 3,750 మంది నుంచి రక్త నమూనాలు సేకరించారు. పట్టణాలు/ నగరాల్లో 30 % , గ్రామీణ ప్రాంతాల్లో 70 % చొప్పున ఈ నమూనాలు తీసుకున్నారు. ఆయా ప్రాంతాల్లో ఇప్పటికే నమోదైన కేసులు, వయసు, పురుషులు, మహిళల కేటగిరి, ఇతర ప్రమాణాల ప్రకారం ఇప్పటి వరకు వైరస్ సోకని వారి నుంచి మాత్రమే ఈ సేకరణ జరిగింది.
వీరి రక్త నమూనాలను క్లియా మిషన్ల ద్వారా పరీక్షించారు. దీని ప్రకారం కృష్ణా జిల్లాలో సుమారు 20 % మందికి వైరస్ సోకి .. వెళ్లిపోయినట్లు తెలిసింది. తూర్పు గోదావరి జిల్లాలో 15 %, నెల్లూరు జిల్లాలో 9 % , అనంతపురం జిల్లాలో 12 % నుంచి 14 % మందికి వైరస్ సోకింది. వీరెవరికీ వైరస్ వచ్చి వెళ్లినట్లు తెలియదు. ఈ ఫలితాలను శాస్త్రీయ పద్ధతిలో విశ్లేషిస్తున్నారు.