Senior Congress Leaders Fires On Revanth: పీసీసీ అధ్యక్షుడు రేవంత్రెడ్డి లక్ష్యంగా కాంగ్రెస్ సీనియర్లు అసంతృప్తి గళమెత్తారు. రేవంత్ ఒంటెద్దు పోకడలతో పార్టీ నాశమవుతోందంటూ.. కాంగ్రెస్ సభ్యత్వానికి, పార్టీలోని అన్ని రకాల పదవులకు దాసోజు శ్రవణ్ రాజీనామా చేశారు. రేవంత్రెడ్డి నేతృత్వంలో అరాచక పరిస్థితులు కొనసాగుతున్నాయన్న ఆయన.. పార్టీని బలహీన పరుస్తున్నారని ధ్వజమెత్తారు. రేవంత్ రెడ్డి, మానిక్కం ఠాగూర్, సునీల్ కుమ్మక్కై.. పార్టీని భ్రష్టు పట్టిస్తున్నారని ఆరోపించారు. ప్రశ్నించిన వారిపై తప్పుడు నివేదికలు అందిస్తున్నారని అన్నారు. పార్టీలో మాఫియా తరహా రాజకీయాలు చేస్తున్నారన్న దాసోజు.. ప్రతి నియోజకవర్గంలో ఐదారుగురిని ప్రోత్సహించి గొడవలు పెడుతున్నారని ఆరోపించారు.
పీసీసీ అధ్యక్షుడు రేవంత్ రెడ్డి లక్ష్యంగా ఎంపీ కోమటిరెడ్డి వెంకట్రెడ్డి విమర్శలు గుప్పించారు. హుజూరాబాద్ ఉపఎన్నికపై ఫోకస్ చేయని రేవంత్ మునుగోడుపై దృష్టిసారించడమేంటని ప్రశ్నించారు. కాంగ్రెస్ వాదులను బయటికి పంపించి.. తెలుగుదేశం వాళ్లను తెచ్చి పోటీ చేయించాలని చూస్తున్నారని దిల్లీలో వ్యాఖ్యానించారు. సొంత నియోజకవర్గంలో తనకు తెలియకుండా కార్యక్రమం ఎలా నిర్ణయిస్తారని ఎంపీ అసంతృప్తి వ్యక్తం చేశారు. ప్రాణం పోయినా పార్టీని వీడేది లేదన్నారు. ఈ విషయంపై సోనియా, రాహుల్ గాంధీ దగ్గరే తేల్చుకుంటానని కోమటిరెడ్డి వెంకట్రెడ్డి స్పష్టం చేశారు.