Second Phase Double Bedroom Houses Distribution : జాతరగా రెండో విడత ఇళ్ల పంపిణీ.. కల నెరవేరిన వేళ లబ్ధిదారుల ఆనందం డబుల్

Second Phase Double Bedroom Houses Distribution : ఇష్టమొచ్చే హామీలతో మభ్యపెట్టాలని చూసే వారి మాటలు నమ్మొద్దని మంత్రి కేటీఆర్‌ సూచించారు. ప్రజల సంక్షేమం కోసం వారిని మించిన కార్యక్రమాలను ముఖ్యమంత్రి ప్రకటించబోతున్నారని తెలిపారు. గ్రేటర్ హైదరాబాద్‌ పరిధిలోని వివిధ ప్రాంతాల్లో జరిగిన రెండు పడక గదుల ఇళ్ల పంపిణీ కార్యక్రమాల్లో మంత్రులు పాల్గొన్నారు. ఇటీవల కాంగ్రెస్‌ పార్టీ ప్రకటించిన గ్యారంటీలపై విమర్శలు గుప్పించిన నేతలు.. రాష్ట్ర ప్రజల గురించి కేసీఆర్‌ మాత్రమే ఆలోచిస్తారని.. దిల్లీ, బెంగళూరు నుంచి వచ్చి చెప్పే వారి మాటలు నమ్మొద్దని కోరారు.

Second Phase Double Bedroom Houses Distribution in Hyderabad : గ్రేటర్‌ హైదరాబాద్‌లో రెండు పడక గదుల ఇళ్ల (Double Bedroom Houses in Hyderabad) రెండోవిడత పంపిణీ కార్యక్రమం ఘనంగా జరిగింది. జీహెచ్‌ఎంసీ పరిధిలో రూ.10,000 కోట్లతో లక్ష ఇళ్ల నిర్మాణం చేపట్టగా.. తొలివిడతలో 11,700 ఇండ్లను లబ్ధిదారులకు పంపిణీ చేశారు. తాజాగా రెండో విడతలో 13,300 ఇళ్లను అర్హులైన వారికి మంత్రులు, ఎమ్మెల్యేలు అప్పజెప్పారు. కుత్బుల్లాపూర్ నియోజకవర్గ పరిధిలోని దుండిగల్‌లో నిర్మించిన 2,100 ఇళ్ల పట్టాల పంపిణీ కార్యక్రమానికి పురపాలక శాఖ మంత్రి కేటీఆర్ హాజరయ్యారు.

KTR Distributed Double Bedroom Houses Dundigal :లబ్ధిదారులకు పట్టాలు అందజేసిన మంత్రి కేటీఆర్ (KTR).. అత్యంత పారదర్శకంగా అర్హులకు గృహాలు అందజేస్తున్నట్లు చెప్పారు. కాంగ్రెస్‌ నేతల ప్రకటనలకు మించి.. ప్రజల సంక్షేమం కోసం ముఖ్యమంత్రి ఆలోచిస్తున్నారని పేర్కొన్నారు త్వరలోనే వాటిని ప్రజల ముందుంచుతామని అన్నారు. ప్రగతిరథ చక్రాలు అడ్డుకునేందుకు యత్నిస్తున్న వారి మాటలు ప్రజలు నమ్మొద్దని కేటీఆర్‌ కోరారు.

"రాష్ట్రవ్యాప్తంగా ఇవాళ ఒక్క రోజే 13,300 ఇళ్లను లబ్ధిదారులకు అందజేస్తున్నాం. ఒక్కొక్క ఇంటి నిర్మాణానికి రూ.10 లక్షలు ఖర్చు అవుతుంది. కాంగ్రెస్‌, బీజేపీ ప్రభుత్వాలు దేశంలో ఎక్కడైనా ఇలాంటి ఇళ్లు నిర్మించాయా?. భవిష్యత్‌లో అర్హులందరికీ రెండు పడకల గదుల ఇళ్లు ఇస్తాం." -కేటీఆర్, మంత్రి

Harishrao Distributed Double Bedroom Houses Kollur :కాంగ్రెస్ నేతలు ఎన్ని దొంగ డిక్లరేషన్‌లు ప్రకటించినా.. ప్రజలు మరోసారి కేసీఆర్‌ను ముఖ్యమంత్రి చేయటం ఖాయమని ఆర్థికశాఖ మంత్రి హరీశ్‌రావు (Harishrao) తెలిపారు. ప్రపంచమంతా తెలంగాణ అభివృద్ధి గురించి మాట్లడుకుంటుంటే.. ఇక్కడున్న కాంగ్రెస్, బీజేపీ నేతలకు మాత్రం కనిపించటంలేదన్నారు. సంగారెడ్డి జిల్లా కొల్లూరులో గ్రేటర్ హైదరాబాద్ పరిధిలోని (2BHK Distribution in GHMC).. 9 నియోజకవర్గాల లబ్ధిదారులకు ఇళ్ల పత్రాలను ఎమ్మెల్యేలతో కలిసి హరీశ్‌రావు అందజేశారు.

"60 ఏళ్లలో కాంగ్రెస్‌ పార్టీ చేయని పనులను కేసీఆర్‌ చేశారు. కుళాయి ద్వారా ఇంటింటికి మంచినీరు అందిస్తున్నాం. కొల్లూరులో ప్రభుత్వ పాఠశాల, అంగన్వాడీ కేంద్రం, బస్తీ దవాఖానా ఏర్పాటు చేస్తాం. కొల్లూరుకు ఆర్టీసీ బస్సులు వచ్చేలా చూస్తాం. ప్రపంచమంతా హైదరాబాద్‌ అభివృద్ధి గురించి మాట్లాడుకుంటున్నారు. కాంగ్రెస్‌, బీజేపీకి మాత్రం హైదరాబాద్‌ అభివృద్ధి కనపడటం లేదు. కేసీఆర్‌ చేస్తున్న అభివృద్ధిని గల్లీ గల్లీకి, ఇంటింటికీ వివరించాలి." - హరీశ్‌రావు, మంత్రి

Ministers Distributed Double Bedroom Houses Kollurహైదరాబాద్‌ చర్లపల్లిలో 1,000 మంది లబ్ధిదారులకు మంత్రి తలసాని శ్రీనివాస్‌యాదవ్‌ ఇళ్ల పట్టాలు పంపిణీ చేశారు. రంగారెడ్డి జిల్లా పెద్దఅంబర్‌పేట్‌ పరిధిలోని హట్టిగూడలో రెండో విడత ఇళ్ల పంపిణీ కార్యక్రమానికి మంత్రి మహేందర్‌రెడ్డి, ఎమ్మెల్యే మంచిరెడ్డి కిషన్‌రెడ్డి, హయత్‌నగర్‌ పరిధిలోని తట్టి అన్నారంలో హోంమంత్రి మహమూద్‌ అలీ, తిమ్మాయిగూడలో జీహెచ్‌ఎంసీ మేయర్‌ విజయలక్ష్మి హాజరై.. లబ్ధిదారులకు పట్టాలు అందజేశారు. మహేశ్వరం నియోజకవర్గం మన్సాన్‌పల్లిలో మంత్రి సబితా ఇంద్రారెడ్డి, మేడ్చల్ నియోజకవర్గం ప్రతాపసింగారంలో ఉపసభాపతి పద్మారావు ప్రభుత్వ గృహాల పట్టాలు పంపిణీ చేశారు.