SBI Chairman Appreciation: హైదరాబాద్ సర్కిల్ పరిధిలో బ్యాంకు అధికారుల పనితీరును స్టేట్ బ్యాంక్ ఆఫ్ ఇండియా ఛైర్మన్ దినేష్ ఖరా అభినందించారు. అధికారులు సమర్థవంతంగా పని చేస్తున్నట్లు ఆయన కొనియాడారు. స్టేట్ బ్యాంక్ ఆఫ్ ఇండియా ఛైర్మన్ దినేష్ ఖరా వివిధ అధికారిక కార్యక్రమాలల్లో పాల్గొనేందుకు హైదరాబాద్ వచ్చారు. ఆదివారం హైదరాబాద్ బంజారాహిల్స్లోని తాజ్ కృష్ణ హోటల్లో... రాష్ట్రంలోని ఏస్బీఐ రీజినల్ మేనేజర్లు, అసిస్టెంట్ జనరల్ మేనేజర్లతో సమావేశమైన ఆయన గడిచిన తొమ్మిది నెలల బ్యాంకుల పనితీరును అడిగి తెలుసుకున్నారు.
ఈ ఆర్థిక సంవత్సరం మరో మూడు నెలలు సమయం ఉన్నందున మరింత సమర్థవంతంగా పని చేయాలని సూచించారు. ఖాతాదారులకు అందించే సేవలు మరింత దగ్గరగా ఉండేటట్లు చూడాలని అధికారులను ఆదేశించారు. వివిధ సేవలకోసం బ్యాంకులకు వచ్చే ఖాతాదారులను ఆకర్షించే విధంగా సేవలు ఉండాలని, ఇబ్బందులకు గురి కాకుండా చూసుకోవాలని స్పష్టం చేశారు. కొవిడ్ సేవలు విస్తృతంగా అందించే ఆస్పత్రులకు చేయూతనివ్వాలని తమ బ్యాంక్ నిర్ణయించిందని ఆయన తెలిపారు.