ప్రజాప్రతినిధుల ఇళ్ల ముందు నిరసనలు: అశ్వత్థామరెడ్డి

హైదరాబాద్​లో ఆర్టీసీ జేఏసీ , విపక్ష నేతలు, ప్రజా సంఘాల ఆధ్వర్యంలో ఏర్పాటు చేసిన సమావేశంలో ఆర్టీసీ భవిష్యత్ కార్యాచరణను ప్రకటించారు. అందులో భాగంగా ఇవాళ ప్రజా ప్రతినిధుల ఇళ్ల వద్ద నిరసన చేపట్టనున్నట్లు ఐకాస కన్వీనర్ అశ్వత్థామరెడ్డి తెలిపారు.

ఆర్టీసీ కార్మికుల సమ్మెలో భాగంగా ఇవాళ ప్రజా ప్రతినిధుల ఇళ్ల వద్ద నిరసనలు చేపట్టనున్నట్లు ఆర్టీసీ జేఏసీ కన్వీనర్ అశ్వత్థామరెడ్డి తెలిపారు. హైదరాబాద్​లోని ఎంప్లాయిస్ యూనియన్ కార్యాలయంలో ఆర్టీసీ జేఏసీ , విపక్ష నేతలు, ప్రజాసంఘాల ఆధ్వర్యంలో సమావేశం నిర్వహించి ఆర్టీసీ భవిష్యత్ కార్యాచరణను ఐకాస నేతలు ప్రకటించారు.

మంగళవారం ఆర్టీసీ జేఏసీ కన్వీనర్​తో పాటు మరో ముగ్గురు కో కన్వీనర్లతో కలిసి ఇందిరాపార్క్ వద్ద నిరవధిక నిరాహారదీక్ష చేయనున్నట్లు తెలిపారు. ఈనెల 14, 15 తేదీల్లో ప్రాణత్యాగం చేసిన కార్మికులతో పాటు ఛలో ట్యాంక్​బండ్ సందర్భంగా గాయపడిన కార్మికుల ఫోటోలను ప్రదర్శన ఏర్పాటు చేస్తామన్నారు. దిల్లీలో మానవ హక్కుల సంఘానికి, మహిళా హక్కుల సంఘానికి ఫిర్యాదు చేయనున్నట్లు అశ్వత్థామరెడ్డి తెలిపారు. ఈ నెల 18న రాష్ట్ర వ్యాప్తంగా సడక్​ బంద్​ను నిర్వహిస్తున్నట్లు తెలిపారు. ప్రభుత్వం ఇప్పటికైనా స్పందించి చర్చలకు పిలవాలని జేఏసీ నేతలు విజ్ఞప్తి చేశారు.

ఇదీ చదవండిః ఆర్టీసీ సమ్మె: 12 నుంచి నిరవధిక నిరాహార దీక్ష