Revanth Reddy on Palamuru RangaReddy Project : 'పాలమూరు-రంగారెడ్డి ప్రాజెక్టు పూర్తి కాకుండానే బీఆర్ఎస్ ప్రారంభిస్తోంది'

RevanthReddy on Palamuru RangaReddy Project : 9 ఏళ్లలో పాలమూరు జిల్లాకు కేసీఆర్‌ ఏం చేశారని రేవంత్​రెడ్డి ప్రశ్నించారు. బీఆర్ఎస్ పాలనలో అత్యధికంగా నష్టపోయిన జిల్లా మహబూబ్‌నగర్ అని అన్నారు. పాలమూరు-రంగారెడ్డి ప్రాజెక్టు 30శాతం కూడా పూర్తి కాలేదని.. కానీ బీఆర్ఎస్ ప్రభుత్వం ప్రారంభిస్తోందని రేవంత్​రెడ్డి విమర్శించారు.

Revanth Reddy on Palamuru Ranga Reddy Project : కేసీఆర్ పాలనలో పాలమూరు వలసలు ఆగలేదని.. అభివృద్ది జరగలేదని టీపీసీసీ అధ్యక్షుడు రేవంత్​రెడ్డి ధ్వజమెత్తారు. పాలమూరుకు ముఖ్యమంత్రి చేసిందేమిటో.. ఆ ప్రాంత బిడ్డల తరపున తాను ప్రశ్నిస్తున్నట్లు తెలిపారు. పాలమూరు -రంగారెడ్డి ప్రాజెక్టు (Palamuru Ranga Reddy Project) పూర్తి కాకుండానే ప్రారంభిస్తున్నామని గొప్పలు చెప్పుకుంటున్నారని ఎద్దేవా చేశారు. 31 పంపుల్లో కేవలం ఒక్క పంపుతోనే ప్రాజెక్టును ప్రారంభిస్తున్నారని రేవంత్​రెడ్డి (Revanth Reddy) దుయ్యబట్టారు.

Revanth Reddy on Palamuru : దేవరకద్ర మాజీ ఎమ్మెల్యే సీతాదయాకర్​రెడ్డి (Seetha Dayakar Reddy ) తన వందలాది మంది అనుచరులతో.. హైదరాబాద్​ గాంధీభవన్​లో రాష్ట్ర ఇంఛార్జ్​ మాణిక్‌రావ్‌ ఠాక్రే, రేవంత్​రెడ్డి సమక్షంలో కాంగ్రెస్ పార్టీలో చేరారు. సీతాదయాకర్​రెడ్డిని రాజకీయంగా అన్నిరకాలుగా పార్టీ ఆదుకుంటుందని రేవంత్​రెడ్డి తెలిపారు. 9 సంవత్సరాల్లో పాలమూరు జిల్లాకు కేసీఆర్‌ ఏం చేశారని ప్రశ్నించారు. 2 ఎంపీ సీట్లు, 13 మంది ఎమ్మెల్యేలను గెలిపిస్తే వలసలు ఆపలేదనిరేవంత్​రెడ్డి విమర్శించారు.

గతంలో తాను ఎమ్మెల్సీగా గెలిచేందుకు దయాకర్​రెడ్డి అండగా నిలబడ్డారని రేవంత్​రెడ్డి గుర్తు చేశారు. తన రాజకీయ ఎదుగుదల్లో ప్రతీసారి అండగా ఉన్నారని వివరించారు. కాంట్రాక్టులు, కమీషన్లు తప్ప దేవరకద్ర అభివృద్ధి.. ఎమ్మెల్యేకు పట్టడంలేదని ఆరోపించారు. నారాయణపేట- కొడంగల్ ఎత్తిపోతలను పెండింగ్​లో పెట్టారని మండిపడ్డారు. పాలమూరు జిల్లాలో 14కు 14 అసెంబ్లీ.. రెండు పార్లమెంట్ స్థానాల్లో కాంగ్రెస్​ను గెలిపించాలని రేవంత్​రెడ్డి కోరారు.

Tukkuguda Vijaya Bheri Sabha :వచ్చే ఎన్నికల్లో తెలంగాణలో కాంగ్రెస్ అధికారంలోకి రావడం ఖాయమని రేవంత్​రెడ్డి ధీమా వ్యక్తం చేశారు . ఈ నెల 16,17,18 తేదీల్లో సోనియా గాంధీ, రాహుల్​ గాంధీ, ప్రియాంక గాంధీ, మల్లిఖార్జున ఖర్గేతో పాటు ఇతర జాతీయ నాయకులు రాష్ట్రానికి వస్తున్నారని పేర్కొన్నారు. ఈ నెల 17న తుక్కుగూడ రాజీవ్​గాంధీ ప్రాంగణంలో జరిగే విజయభేరి సభకు (Tukkuguda Vijaya Bheri Sabha ) భారీగా ప్రజలు తరలిరావాలని రేవంత్​రెడ్డి పిలుపునిచ్చారు.

"9 ఏళ్లలో పాలమూరు జిల్లాకు కేసీఆర్‌ ఏం చేశారు?. బీఆర్ఎస్ పాలనలో అత్యధికంగా నష్టపోయిన జిల్లా మహబూబ్‌నగర్. పాలమూరు- రంగారెడ్డి ప్రాజెక్టు 30 శాతం కూడా పూర్తి కాలేదు. ప్రాజెక్టు పూర్తి కాకుండానే బీఆర్ఎస్ ప్రభుత్వం ప్రారంభిస్తోంది. 2 ఎంపీ సీట్లు, 13 మంది ఎమ్మెల్యేలను గెలిపిస్తే వలసలు ఆపలేదు. 9 ఏళ్లలో పాలమూరు జిల్లాలో వలసలు ఆగలేదు. నారాయణపేట- కొడంగల్ ఎత్తిపోతలను పెండింగ్​లో పెట్టారు. పాలమూరు జిల్లాలో 14కు 14 అసెంబ్లీ, రెండు పార్లమెంట్ స్థానాల్లో కాంగ్రెస్​ను గెలిపించాలి. వచ్చే ఎన్నికల్లో రాష్ట్రంలో కాంగ్రెస్ అధికారంలోకి రావడం ఖాయం."- రేవంత్​రెడ్డి, టీపీసీసీ అధ్యక్షుడు

రంగారెడ్డి జిల్లా తుక్కుగూడలో ఈ నెల 17న కాంగ్రెస్ పార్టీ నిర్వహించే విజయభేరి భారీ బహిరంగ సభ ప్రాంగణంలో రాష్ట్ర ఇంఛార్జ్ మాణిక్​రావు ఠాక్రే భూమి పూజ చేశారు. ఈ కార్యక్రమంలో రేవంత్​రెడ్డి, షబ్బీర్ అలీ, మధుయాస్కీ గౌడ్, మాజీ ఎమ్మెల్యే మల్​రెడ్డి రంగారెడ్డి తదితరులు పాల్గొన్నారు.