Rajagopal Reddy Clarified on Party Change : బీజేపీని వీడి.. తాను కాంగ్రెస్లో చేరుతానని వస్తున్న వార్తలను బీజేపీ నేత, మాజీ ఎమ్మెల్యే కోమటిరెడ్డి రాజగోపాల్ రెడ్డి తీవ్రంగా ఖండించారు. రాష్ట్ర ప్రజలను నమ్మించి మోసం చేస్తున్న సీఎం కేసీఆర్ను గద్దె దించడానికే.. తాను బీజేపీలోకి వచ్చానని పునరుద్ఘాటించారు. ఈ మేరకు దిల్లీలో మాట్లాడిన ఆయన.. రేవంత్రెడ్డిపై తీవ్రస్థాయిలో విమర్శలు చేశారు.
ఈ సందర్భంగా కర్ణాటక ఫలితాలను చూపించి.. కాంగ్రెస్లోకి మళ్లీ రావాలని తమ మిత్రులు అడుగుతున్నారని కోమటిరెడ్డి రాజగోపాల్ రెడ్డి తెలిపారు. బీజేపీని వీడుతున్నట్లు వస్తున్న వార్తలను ఖండిస్తున్నట్లు చెప్పారు. కర్ణాటక పరిస్థితులు వేరు.. తెలంగాణ పరిస్థితులు వేరని ఈ సందర్భంగా వివరించారు. తాను బీజేపీని విడిచి కాంగ్రెస్లోకి వెళ్లే ప్రసక్తే లేదని.. కేవలం కేసీఆర్ను గద్దె దించడానికే భారతీయ జనతా పార్టీతో దోస్తీ కట్టానని వెల్లడించారు. ప్రస్తుతం రాష్ట్ర పీసీసీ అధ్యక్షుడిగా కొనసాగుతున్న రేవంత్ రెడ్డి వంటి వారు తనపై దుష్ప్రచారం చేశారని ఆవేదన వ్యక్తం చేశారు. ఆ దుష్ప్రచారంతోనే మునుగోడులో తనపై గెలిచారని ఆరోపించారు.
రేవంత్రెడ్డి బ్లాక్ మెయిల్ చేసి కోట్లు సంపాదన..: రేవంత్ రెడ్డి బ్లాక్ మెయిల్ చేసి రూ.కోట్లు సంపాదించారని.. ఆర్టీఐను అడ్డం పెట్టుకొని బెదిరింపు రాజకీయాలు చేశారని రాజగోపాల్ రెడ్డి ఆరోపణలు చేశారు. కాంగ్రెస్ నుంచి తనకు ఆహ్వానం వస్తున్న మాట నిజమేనని.. కానీ తాను కాంగ్రెస్లో చేరడం లేదని స్పష్టం చేశారు. ఇలాంటి తప్పుడు వార్తలను నమ్మవద్దని పార్టీ శ్రేణులకు, కార్యకర్తలకు సూచించారు. రాష్ట్రంలో కాంగ్రెస్ పార్టీ గెలవక ముందే రాష్ట్ర కాంగ్రెస్లో విభేదాలు వస్తున్నాయని.. పదవుల కోసం కొట్లాడుకుంటున్నారని తీవ్రస్థాయిలో ధ్వజమెత్తారు. తాను డబ్బుల కోసం అమ్ముడుపోయే వ్యక్తిని కాదని.. పోరాడే వ్యక్తినన్నారు. ప్రత్యేక రాష్ట్రం కోసం పోరాడిన వ్యక్తిపై ఎన్నో అపనిందలు వేశారని ఆవేదన చెందారు.