కేంద్రానికి వ్యతిరేకంగా హోరెత్తిన నిరసనలు

నూతన వ్యవసాయ చట్టాలను వ్యతిరేకిస్తూ చేపట్టిన భారత్​ బంద్​లో భాగంగా తెరాస, సీపీఎం, కాంగ్రెస్ శ్రేణులు నిరసనలు తెలియజేశాయి. సికింద్రాబాద్​ అడ్డగుట్ట డివిజన్​లో ప్లకార్డులు ప్రదర్శిస్తూ మోదీ దిష్టిబొమ్మను దహనం చేశారు.

రైతులకు మద్దతుగా చేపట్టిన భారత్​ బంద్​లో అధికార తెరాసతో పాటు సీపీఎం, కాంగ్రెస్​ శ్రేణులు నిరసనలతో కదం తొక్కాయి. మంత్రి కేటీఆర్​ ​బంద్​కు పిలుపునివ్వడంతో సికింద్రాబాద్ అడ్డగుట్టలో తెరాస నాయకులు ద్విచక్రవాహన ర్యాలీ నిర్వహించారు. తుకారాంగేట్, శాంతినగర్, లాలాపేట్ మీదుగా తిరుగుతూ కేంద్రానికి వ్యతిరేకంగా నినాదాలు చేశారు. అడ్డగుట్ట చౌరస్తాలో డివిజన్​ కార్పొరేటర్​ ప్రసన్న లక్ష్మి ఆధ్వర్యంలో ర్యాలీ చేపట్టారు.

అడ్డగుట్టలో సీపీఎం నాయకులు ప్లకార్డులు ప్రదర్శిస్తూ మోదీ దిష్టిబొమ్మను తగలబెట్టారు. తుకారాంగేట్​లోని పలు ప్రాంతాల్లో కాంగ్రెస్ కార్యకర్తలు ఆందోళనలు నిర్వహించారు. కేంద్రానికి వ్యతిరేకంగా నినాదాలు చేస్తూ నూతన వ్యవసాయ చట్టాలను రద్దు చేయాలంటూ పాదయాత్ర చేపట్టారు.

ఇదీ చూడండి:'రైతు వ్యతిరేక చట్టాలను రద్దు చేసేంతవరకు పోరాటం చేస్తాం'