'వరద సాయంలో సగానికిపైగా తెరాస నేతలు దోచుకున్నారు': రేవంత్​

హైదరాబాద్‌ జీహెచ్‌ఎంసీ ప్రధాన కార్యాలయం ఎదుట ఎంపీ రేవంత్​ రెడ్డి ఆధ్వర్యంలో కాంగ్రెస్ నేతలు, మహిళలు పెద్ద ఎత్తున ఆందోళన చేపట్టారు. వరద బాధితులకు తక్షణ సాయం రూ.10 వేలు పంపిణీ చేయాలని డిమాండ్‌ చేశారు.

వరద బాధితులకు 10వేల రూపాయల చొప్పున.. తక్షణ ఆర్థిక సాయం అందించాలని కాంగ్రెస్‌ పార్టీ డిమాండ్‌ చేసింది. ఎంపీ రేవంత్‌రెడ్డి ఆధ్వర్యంలో జీహెచ్​ఎంసీ ప్రధాన కార్యాలయం ఎదుట కాంగ్రెస్‌ నేతలు ఆందోళనకు దిగారు. రంగారెడ్డి, మేడ్చల్ జిల్లాల డీసీసీ నేతలతో పాటు మహిళలు నిరసన ప్రదర్శన చేపట్టారు. వరద సాయం పంపిణీలో అక్రమాలు జరిగాయని ఎంపీ రేవంత్‌రెడ్డి ఆరోపించారు. బాధితులను వెంటనే ఆదుకోవాలని నినాదించారు.

వరద సాయం రూ.550 కోట్లలో సగానికి పైగా తెరాస నేతలు దోచుకున్నారు. లబ్ధిదారులకు పైసలు అందలేదు.. తెరాస కార్యకర్తలకే చేరాయి. తెరాస నేతలు వరద సాయం రూ.10 వేలులో సగం కొట్టేస్తున్నారు. ఓట్లు కొనుగోలు చేయడానికే నగదు బదిలీ పథకం పెట్టారు. రూ.8,860 కోట్ల నష్టం వాటిల్లిందని ప్రధానికి సీఎం లేఖ రాశారు.. తెరాస ప్రభుత్వం ఇచ్చిన రూ.550 కోట్లు ఏ మేరకు సరిపోతాయి? -రేవంత్‌రెడ్డి, మల్కాజిగిరి ఎంపీ

జీహెచ్‌ఎంసీ కమిషనర్‌ లోకేశ్​కుమార్‌ను సోమవారం కలవడానికి శనివారమే అనుమతి తీసుకున్నామని.. అనుమతి ఇచ్చిన అధికారి కార్యాలయం నుంచి పారిపోయారని రేవంత్ రెడ్డి ఆరోపించారు. కమిషనర్ పారిపోయి ఒక మహిళా అధికారిణిని పంపించారని తెలిపారు. ఎల్బీనగర్‌, కూకట్‌పల్లి,మల్కాజిగిరి జోనల్‌ కమిషనర్​లకు బస్తీల వివరాలతో ఫిర్యాదు చేసి.. క్షేత్రస్థాయిలో పనిచేస్తున్న అధికారులకు చెప్పి నిజమైన లబ్దిదారులకు సహాయం అందేలా పనిచేశామని రేవంత్ రెడ్డి వివరించారు.

ఇదీ చూడండి:ఉస్మాన్‌నగర్‌లో దారుణ పరిస్థితులు.. ఏ వీధి చూసినా నీరే!