ఆర్థిక మాంద్యం ప్రభావం... వచ్చే ఆర్నెల్లూ సవాళ్లే...

రాష్ట్ర ఖజానాకు రాబడులు భారీగా తగ్గిన నేపథ్యంలో ప్రస్తుత బడ్జెట్​ కేటాయింపులు సవాళ్లతో కూడుకున్నవే. వచ్చే ఆర్నెల్లూ ఖర్చులు అధికంగా పెరగనున్నాయి. ప్రభుత్వ ప్రాధాన్య కార్యక్రమాలతో పాటు కీలకమైన పథకాలకు భారీ మొత్తంలో వెచ్చించాల్సి ఉంది. రాష్ట్ర ఆదాయంపై ఆర్థిక మాంద్యం నీలి నీడలు కమ్ముకున్న నేపథ్యంలో సీఎం కేసీఆర్​ అందుకు అనుగుణంగా బడ్జెట్​కు తుది రూపు ఇచ్చారు.

రాష్ట్ర ఆదాయంపై ఆర్థిక మాంద్యం నీలి నీడలు కమ్ముకుంటున్నాయి. అనుకున్న మేర ఆదాయం ఉండడం లేదు. ఫిబ్రవరి నెలలో రాష్ట్ర ప్రభుత్వం ఓట్​ ఆన్​ అకౌంట్​ బడ్జెట్​ తీసుకొచ్చినప్పటి నుంచి మారిన పరిస్థితులు ఖజానాపై తీవ్ర ప్రభావం చూపుతున్నాయి. ఇవాళ ప్రవేశపెట్టనున్న రాష్ట్ర బడ్జెట్​... ఓట్​ ఆన్ బడ్జెట్​​ కంటే తగ్గనుంది. మాంద్యం పరిస్థితులు రాష్ట్ర రాబడులపై మున్ముందు మరింత ఎక్కువవుతాయని ఆర్థిక శాఖ అధికారులు అంచనా వేస్తున్నారు.

తగ్గిన పన్ను రాబడులు...

స్టాంపులు, రిజిస్ట్రేషన్ల రాబడి మినహా అన్ని పన్ను రాబడులపై ప్రతికూల ప్రభావం మొదలైంది. ఖజానాకు కీలకమైన అమ్మకం పన్ను ఆదాయం తగ్గింది. జీఎస్టీ రాబడుల్లో సగటున ఏటా 17 శాతం వృద్ధి రేటు కొనసాగుతుండగా ఈసారి 12 నుంచి 14 శాతం మధ్యే ఉంటుందని ఆర్థిక, వాణిజ్య, పన్నుల శాఖల అధికారులు విశ్లేషిస్తున్నారు. మద్యం అమ్మకాల ఆదాయం కూడా ఆర్నెల్ల కాలంలో తగ్గవచ్చనే అంచనాలున్నాయి. రాష్ట్రానికి కేంద్ర పన్నుల వాటా గ్రాంట్​ ఇన్​ ఎయిడ్​ల తగ్గుదల కూడా బడ్జెట్​ను ప్రభావితం చేస్తోంది.

ముందంతా 'వ్యయ'కాలమే

అక్టోబరు నుంచి రానున్న ఆర్నెల్లు రాష్ట్రంలో ఖర్చులు భారీగా పెరగనున్నాయి. ప్రభుత్వ ప్రాధాన్య కార్యక్రమాలతో పాటు కీలకమైన పథకాలకు భారీ మొత్తంలో వెచ్చించాల్సి ఉంది. సాగునీటి ప్రాజెక్టుల బిల్లుల చెల్లింపు, ఉపకార వేతనాల బకాయిలు చాలా ఉన్నాయి. రైతు బంధు పథకానికి రూ.12 వేల కోట్లు అవసరమని అంచనా వేయగా ఇప్పటికి చెల్లించింది రూ.3,500 కోట్లు మాత్రమే. రైతు రుణమాఫీ, నిరుద్యోగ భృతి, ఆసరా పింఛన్లు, కల్యాణ లక్ష్మీ, షాదీ ముబారక్​, ఎస్సీ, ఎస్టీ, బీసీ మైనార్టీ సంక్షేమానికి భారీ మొత్తంలో నిధులు కేటాయించాల్సి ఉంది. ఏది ఏమైనప్పటికీ వస్తున్న రాబడులకు అనుగుణంగా... అన్ని రంగాలకు న్యాయం చేకూర్చేలా సీఎం కేసీఆర్​ బడ్జెట్​కు తుది రూపునిచ్చారు.

ఇదీ చూడండి : స్విస్ బ్యాంక్ డేటా విశ్లేషిస్తే అన్నీ మూతపడ్డ ఖాతాలే!